। श्रीवर्धन । वार्ताहर ।
श्रीवर्धन नगरपरिषदेच्या गोठण विभागातील डंपिंग ग्राउंडला सोमवार, दि.10 जानेवारी रोजी सकाळी सात वाजता अचानक आग लागून सुमारे 1,75000/- रुपयांचे नुकसान झाले आहे. तेथील रहिवासी प्रभावती उपाध्ये यांनी नगरपरिषद कार्यालयात फोन करून लागलेल्या आगीची माहिती देताच नगरपरिषदेच्या कर्मचार्यांनी दोन पाण्याच्या बंबांच्या सहाय्याने आग आटोक्यात आणली. या आगीत जीवितहानी झाली नाही. परंतु, प्लॅस्टीक बेलींग शेड, प्लॅस्टीक बेलींग मशीन,प्लॅस्टीक गठ्ठे व इलेक्ट्रिक वायरिंग भस्मसात झाले आहे. संतोष खाडे यांनी दिलेल्या फिर्यादी नुसार पोलीस निरीक्षक प्रमोद बाबर यांच्या मार्गदर्शनाखाली अंमलदार डी.सी.सरकटे यांनी तक्रार दाखल करून घेतली आहे. आगीचे वृत्त समजताच प्रांताधिकारी अमित शेडगे, नगरपरिषद मुख्याधिकारी विराज लबडे, प्रसाड डोंगरे, विकास वागवेकर, गटनेते अनंत गुरव यांनी घटनास्थळी जाऊन कर्मचार्यांच्या बरोबर आग आटोक्यात आणण्यासाठी प्रयत्न केले.