गोव्यात नाईट क्लबमध्ये अग्नितांडव

23 जणांचा होरपळून मृत्यू; राष्ट्रपती अन्‌‍‍ पंतप्रधानांकडून शोक व्यक्त

| पणजी | वृत्तसंस्था |

गोव्यातील अर्पोरा येथील एका क्लबमध्ये भीषण आग लागल्याची दुर्घटना शनिवारी (दि.6) रात्री घडली आहे. मध्यरात्री लागलेल्या या आगीत तब्बल 25जणांचा होरपळून मृत्यू झाला आहे. तसेच अनेक जण जखमी झाले असून त्यांच्यावर रुग्णालयात उपचार सुरू आहेत. ही आगीची घटना सिलिंडरच्या स्फोटामुळे घडल्याची प्राथमिक माहिती समोर येत आहे. ही घटना घडल्यानंतर अग्निशामक दलाने तात्काळ घटनास्थळी पोहोचून आगीवर नियंत्रण मिळवलं.

बहुतेक लोकांचा मृत्यू गुदमरून झाला कारण ते घाबरून तळघरात पळून गेले. लोबो यांनी पुष्टी केली की मृतांमध्ये काही पर्यटक होते, तर बहुतेक स्थानिक लोक रेस्टॉरंटच्या तळघरात काम करत होते. गोव्याचे मुख्यमंत्री प्रमोद सावंत यांनी घटनास्थळी भेट दिली आणि क्लबने अग्निसुरक्षा नियमांचे पालन केले नसल्याचे उघड केले. या घटनेला अत्यंत त्रासदायक म्हणत मुख्यमंत्री सावंत यांनी सविस्तर चौकशीचे आदेश दिले आहेत आणि क्लब व्यवस्थापन आणि सुरक्षेतील त्रुटी असूनही क्लबला काम करण्यास परवानगी देणाऱ्या अधिकाऱ्यांवर कठोर कारवाई करण्याचे आश्वासन दिले आहे. भाजप आमदार मायकल लोबो यांनी या दुःखद घटनेनंतर सुरक्षा ऑडिटची तातडीने गरज असल्याचे प्रतिपादन केले. आपल्याला गोव्यातील इतर सर्व क्लबचे सुरक्षा ऑडिट करावे लागेल, जे खूप महत्वाचे आहे, असे ते म्हणाले. पर्यटकांनी नेहमीच गोव्याला एक अतिशय सुरक्षित ठिकाण मानले आहे, परंतु ही घटना खूपच अस्वस्थ करणारी आहे आणि भविष्यात अशा घटना घडू नयेत, असे ते म्हणाले.

पंतप्रधान मोदींनी व्यक्त केला शोक
गोव्यातील अर्पोरा येथील आगीची दुर्घटना अत्यंत दुःखद आहे. ज्यांनी आपल्या प्रियजनांना गमावले आहे त्यांच्याबद्दल माझ्या संवेदना आहेत. जखमी लवकरात लवकर बरे व्हावेत अशी प्रार्थना करतो. गोव्याचे मुख्यमंत्री डॉ. प्रमोद सावंत जी यांच्याशी परिस्थितीबद्दल बोललो. राज्य सरकार बाधितांना सर्वतोपरी मदत करत आहे.