उघड्यावरील अन्नपदार्थ खाऊ नये: डॉ. गुणे

| उरण | वार्ताहर |

उरण तालुक्यातील दिघोडे गावातील एका टपरीवर उघड्यावरील शोरमा हा खाद्यपदार्थ खाल्याने अनेकांना पोटात मळमळणे-दुखणे, उलट्या, जुलाबसारखं वाटत असल्याने पनवेल येथील गुणे रुग्णालयात उपचाासाठी दाखल करण्यात आले आहे. तसेच मंगळवारी (दि. 31) एका शोरमाबाधित रुग्णाला रुग्णालयात उपचारार्थ दाखल केले आहे. सध्या त्या रुग्णांची प्रकृती चांगली असली तरी नागरिकांच्या जीवाशी खेळणार्‍यांना संबंधित प्रशासन परवानगी देतेच कशी, असा सवाल डॉ. गिरीश गुणे यांनी उपस्थित करुन लहान मुलांनी, नागरिकांनी उघड्यावरील अन्नपदार्थ खाऊ नयेत, असे आवाहन केले आहे.

घटनेचे वृत्त वार्‍यासारखे पसरताच नागरिकांमध्ये घबराटाचे वातावरण निर्माण झाले. तर शासकीय आरोग्य विभागाने तातडीने यावर ठोस उपाययोजना करण्यासाठी तसेच शोरमाबाधित रुग्णांना मोफत वैद्यकीय सुविधा उपलब्ध करून देण्यासाठी गावागावात रुग्णांची तपासणी सुरू केल्याची माहिती तालुका आरोग्य विभागाच्यावतीने देण्यात आली आहे.

एकंदरीत डॉ. प्रकाश मेहता, डॉ. गिरीश गुणे, डॉ. सिध्दराम अवंती पाटील, तालुका आरोग्य अधिकारी डॉ. राजेंद्र इटकरे तसेच परिचारिका कर्मचारी यांच्या सतर्कतेमुळे शोरमा बाधित रुग्णांचे प्राण वाचले असले, तरी अन्न व औषध विभाग प्रशासन, पोलीस यंत्रणा यांनी उरण तालुक्याकडे दुर्लक्ष न करता नागरिकांच्या जीवाशी खेळणार्‍या उरण शहर व तालुक्यातील गावा गावातील नाक्यांवर राजरोसपणे उघड्यावर विक्री करणार्‍या खाद्यपदार्थ विक्रेत्यांवर कायदेशीर कारवाई करावी, अशी मागणी नागरिकांकडून करण्यात येत आहे.