विकासाला बसणार खीळ

पुढील अडीच वर्षे सभापतींची धुरा उपसभापतींकडे

| म्हसळा | प्रतिनिधी |

म्हसळा पंचायत समितीच्या सार्वत्रिक निवडणुकीकरिता आरक्षण सोडत प्रक्रिया सोमवारी पंचायत समिती कार्यालयात पार पडली. अध्यासी अधिकारी भारत वाघमारे उपजिल्हाधिकारी पुनर्वसन यांच्या प्रमुख उपस्थितीत प्राधिकृत अधिकारी तहसीलदार सचिन खाडे यांच्या मार्गदर्शनाखाली आरक्षण सोडत काढण्यात आल्या. आरक्षण सोडतीनंतर निवडणूक लढविण्यास इच्छूक असलेल्या अनेकांना मोठा धक्का बसला आहे.

म्हसळा तालुक्यातील पंचायत समितीच्या चार गणातील सदस्यांकरिता ही सोडत काढण्यात आली. यामध्ये पाभरे गटात सर्वसाधारण महिला, पांगलोली गटात ना. म.प्र. महिला, साळवींडे गटात सर्वसाधारण खुला, खरसई गटात सर्वसाधारण खुला असे आरक्षण पडले. या आरक्षण प्रक्रियेवेळी पक्षाच्या पदाधिकारी यांची उदासीनता दिसून आली. यावेळी मोजकेच पदाधिकारी उपस्थित होते. जिल्हा परिषदच्या पाभरे आणी पांगलोली या जागांसाठीसुद्धा आरक्षण जाहीर झाले असून, दोन्ही ठिकाणी सर्वसाधारण खुला आरक्षण पडले आहे. जिल्ह्याला सभापती आरक्षणात अनु. जमाती महिला आरक्षण पडले होते, परंतु निवडणूक आयोगाच्या निर्णयानुसार अनु. जमाती आरक्षण बसत नसल्यामुळे पुढील अडीच वर्षे उपसभापतींकडे सभापतींची धुरा सोपविली जाईल, त्यामुळे विकासाला खीळ बसण्याची शक्यता वर्तविली जाते. आरक्षण सोडतीची चिठ्ठी इयत्ता तिसरीतील विद्यार्थिनी अनन्या उदयकुमार कळस हिच्या हस्ते काढण्यात आली. याप्रसंगी उपजिल्हाधिकारी भारत वाघमारे, तहसीलदार साचिन खाडे, निवासी नायब तहसीलदार चंद्रशेखर खोत, निवडणूक तहसीलदार संध्या अंबुर्ले, अव्वल कारकून साचिन धोंडगे, सलीम शहा आदी मान्यवर उपस्थित होते.