दुर्दैवी घटना! वनरक्षक सुरज सारंगे यांचा अपघाती मृत्यू

सुरक्षेच्या अभावामुळे संबंधित प्राधिकरण व कंत्राटदाराविरोधात संताप

| अलिबाग | प्रतिनिधी |

अलिबाग वनविभागातील तिनविरा येथे कार्यरत असलेले वनरक्षक सुरज सारंगे यांचा शुक्रवारी (दि.6) रात्री रस्ता अपघातात दुर्दैवी मृत्यू झाला. सारंगे हे त्यांच्या मुरूड तालुक्यातील सर्व्हे येथील घरी जात असताना रेवस–रेड्डी मार्गावर खोदून ठेवलेल्या मोरीत त्यांचा तोल जाऊन मोटारसायकल खोल खड्ड्यात पडली. या अपघातात त्यांचा जागीच मृत्यू झाला.

काही दिवसांपूर्वीच सारंगे यांना जुळे अपत्य झाले होते. शुक्रवारीच ही दोन्ही बाळे हॉस्पिटलमधून त्यांच्या घरी आली होती. या आनंदाचा क्षण त्यांनी आपल्या मोबाईलवर स्टेटसद्वारे व्यक्त केला होता. मात्र, आनंदाच्या वातावरणात असतानाच नियतीने त्यांच्यावर घाला घातल्याने ही दुर्दैवी घटना घडली असून वनविभागात शोककळा पसरली आहे. दरम्यान, रेवस–रेड्डी मार्गावरील कामादरम्यान खोदून ठेवलेल्या खड्ड्याजवळ आवश्यक सुरक्षेची उपाययोजना करण्यात आलेली नव्हती. त्या ठिकाणी योग्य बॅरिकेट्स, सूचना फलक, रात्री स्पष्ट दिसण्यासाठी रेडियम पट्ट्या किंवा लाल दिवे लावलेले नसल्याचे दिसून आले आहे. या निष्काळजीपणाबाबत संबंधित प्राधिकरण व कंत्राटदारांविरोधात महाराष्ट्र वनरक्षक-वनपाल संघटना, शाखा अलिबागचे अध्यक्ष व पदाधिकाऱ्यांनी तीव्र रोष व्यक्त केला असून या घटनेची सखोल चौकशी करून जबाबदारांवर योग्य कारवाई करण्याची मागणी केली आहे.