फॉरेक्स ट्रेडिंगच्या नावावर चाळीस लाखांची फसवणूक

चौघांवर गुन्हा दाखल

| पनवेल | विशेष प्रतिनिधी |

फॉरेक्स ट्रेंडिंगमध्ये गुंतवणूक करतो असे आश्वासन देऊन 40 लाख रुपयांची फसवणूक केल्याप्रकरणी जाई मनोहर कदम, सूरज कदम (दोघे कोरेगाव-सातारा), सचिन डोंगरे (बोनकोडे), विकास निकम (कोपरखैरणे)च्या विरोधात तुर्भे एमआयडीसी पोलीस ठाण्यात गुन्हा दाखल करण्यात आला.

मनीषा किर्वे ह्या घणसोली येथे राहात असून, त्यांच्या पतीची ओळख कोळखे, फलटण येथील सचिन डोंगरे यांच्याशी झाली. त्यावेळी विकास निकम व सचिन यांनी फॉरेक्स ट्रेंडिंगची त्यांना माहिती दिली. जे.के.व्ही. ग्लोबल या कंपनीद्वारे फॉरेक्स ट्रेंडिंगमध्ये पैसे गुंतवतात आणि गुंतवणुकीवर झालेल्या नफ्याचे 30 टक्के कमिशन घेऊन उर्वरित 70 टक्के नफा गुंतवणूकदारांना देत असतात, असे सांगितले. तोटा झाला तर सदर कंपन्या स्वतः गुंतवणूकदारांचे पैसे परत करत असतात. यावेळी जे.के.व्ही. ग्लोबलचे मालक जाई मनोहर कदम व सूरज कदम यांच्या माध्यमातून फॉरेक्स ट्रेंडिंग करतात असे सांगून त्यांच्यावर फोनवरून बोलणे करून दिले. त्यावेळी त्यांनी वीस लाख रुपये गुंतवले. त्यानंतर पुन्हा वीस लाख रुपये गुंतवले.

यावेळी ट्रेंडिंग खात्यामध्ये चांगली ग्रोथ चालू असल्याचे विकास निकम याने सांगितले. खात्याचा तपशील मागितला असता खात्याबद्दल माहिती दिली नाही. त्यामुळे त्यांच्यावर संशय येऊ लागला. त्यानंतर कंपनीच्या मेल आयडीवर गुंतवणूक केलेले चाळीस लाख रुपये परत मिळण्याविषयी मेल केला. यावेळी तुमचा व्यवहार पूर्ण झाला असून, लवकरच निर्णय घेऊन तुम्हाला कळवू, असा रिप्लाय आला. तसेच सचिन डोंगरे व विकास निकम यांच्याशी संपर्क साधला असता त्यांनी उडवाउडवीची उत्तरे दिली आणि जाई कदम व सुरेश कदम यांनी फोन घेणे बंद केले. फसवणूक झाल्याचे लक्षात येतात चौघांविरोधात गुन्हा दाखल केला.