। अलिबाग । प्रतिनिधी ।
डॉ. सुभाष शिवराम म्हात्रे अध्यक्ष असलेल्या शिवशांती स्नेहालय व विरंगुळा केंद्र, अलिबाग या संस्थेची वाडगाव येथे नियोजित कामाचा शुभारंभ अक्षय तृतीयेचे औचित्य साधून (दि.10) मे रोजी करण्यात आला. याप्रसंगी अलिबागेतील प्रसिद्ध उद्योजक, ब्रह्मा-विष्णू-महेश सिनेप्लेक्सचे संचालक गजेंद्र दळी यांच्या हस्ते वृद्धाश्रमाच्या इमारतीची पायाभरणी करण्यात आली.
वाडगाव येथील डॉ. सुभाष शिवराम म्हात्रे यांनी शिवशांती स्नेहालय वृद्धाश्रमासाठी अठरा एकर जमीन दिली आहे. त्याजमिनीवरील पहिल्या इमारतीची पायाभरणी यावेळी करण्यात आली. याप्रसंगी संस्थेचे उपाध्यक्ष डॉ. किरण नाबर, योगेश दीनानाथ तरे, डॉ. प्रतिभा म्हात्रे, प्रफुल्ल राऊत, डॉ. जगदीश थळे, डॉ. सुरेश म्हात्रे, डॉ. अनिल डोंगरे, कचरु पाटील, समीर गवळी, अॅड. मनोज पडते, शरद कोरडे या पदाधिकार्यांसह, उमाजी केळुसकर, सरपंच प्रसाद (पिंट्या) गायकवाड, सुधीर गायकवाड, संजना पाटील आदींची उपस्थिती होती. याप्रसंगी उपस्थित मान्यवरांकडून उत्स्फूर्तपणे संस्थेस देणग्या देण्यात आल्या. यावेळी डॉ. सुभाष म्हात्रे यांनी आपले अध्यक्षीय मनोगत व्यक्त केले. त्यांनी या वृद्धाश्रमासाठी अनेकानेक देणगीदार पुढे येत असून अजूनही मोठ्या प्रमाणात देणगीची आवश्यकता असून त्यासाठी दानशूरांनी सहकार्य करावे, असे आवाहन केले. लवकरच अद्ययावत वृद्धाश्रम आणि विरंगुळा केंद्र उभे राहील अशीही त्यांनी याप्रसंगी ग्वाही दिली. प्रास्ताविक डॉ. प्रतिभा म्हात्रे यांनी केले. अखेरीस आभार प्रफुल्ल राऊत यांनी मानले.