दुचाकींच्या धडकेत चार जण जखमी

। माणगाव । प्रतिनिधी ।

माणगावजवळील ढाळघर गावच्या हद्दीत मुंबई-गोवा महामार्गावर दोन दुचाकींमध्ये धडक लागून अपघात झाला. या अपघातात 4 जण जखमी झाले असून दोन्ही वाहनांचे नुकसान झाले आहे. हा अपघात गुरुवारी (दि.12) सायंकाळी 5.30 वाजण्याच्या सुमारास झाला.

पोलिसांच्या माहितीनुसार, अपघाताच्या गुन्ह्यातील आरोपी आकाश शशिकांत गुगले (26) रा.निळगुण ता.माणगाव व त्यांच्या पाठीमागे बसलेला त्यांचा सहकारी असे त्यांच्या ताब्यातील स्प्लेंडर मोटार सायकल हि गाडी मुंबई-गोवा राष्ट्रीय महामार्गावरून भरधाव वेगाने चालवीत घेऊन जात होते. दरम्यान, माणगावजवळील ढाळघर गावच्या हद्दीत आल्यावर स्कुटीला पाठीमागून धडक देऊन अपघात घडला. या अपघातात कु.स्नेहल चंद्रकांत दळवी (24) रा.बोरिवली मुंबई, साक्षी बबन शेलार (22) रा.पाचोळे ता.माणगाव, सागर लक्ष्मण झूमरे (28) रा.जोर ता.माणगाव, प्रकाश शशिकांत गुगले (26) रा.निळगुण ता.माणगाव हे चार जण जखमी झाले असून या अपघातात दोन्ही वाहनांचे नुकसान झाले.

या अपघाताची नोंद माणगाव पोलीस ठाण्यात करण्यात आली असून याप्रकरणी अधिक तपास पोलीस करत आहेत.