एमजीएम रुग्णालयात चार वर्षीय मुलाचा मृत्यू

| नवीन पनवेल | वार्ताहर |
कामोठे एमजीएम रुग्णालयात एका चार वर्षीय मुलाचा मृत्यू झाला आहे. हॉस्पिटलमधील टेक्निशियनने या मुलाला इंजेक्शन दिल्यानेच मुलाचा मृत्यू झाल्याचा आरोप केला जात आहे. याप्रकरणी मृत मुलाचा शवविच्छेदन अहवाल आणि डॉक्टरांच्या समितीचा अहवाल आल्यानंतर पुढील कारवाई करण्यात येईल, असे पोलिसांनी सांगितले आहे. अर्जुन नेपाळी याच्या पाठीवर गाठ आली होती. यासाठी त्याला एमजीएम रुग्णालयात उपचारासाठी आणले होते. एमजीएम रुग्णालयातील टेक्निशियनने दिलेल्या चुकीच्या इंजेक्शनमुळेच त्या मुलाचा जागीच मृत्यू झाल्याचा आरोप कुटुंबीय आणि मनसे कार्यकर्त्यांकडून केला जात आहे. या चार वर्षीय मुलाच्या मृत्यूनंतर टेक्निशन फरार असल्याचे समोर आले आहे. याबाबत मयत मुलाच्या कुटुंबियांनी मनसेचे पनवेल शहराध्यक्ष योगेश चिले यांच्याकडे तक्रार केली. त्यांनी हॉस्पिटलमध्ये जाऊन प्रशासनाला जाब विचारला व पोलीस ठाणे गाठले. यावेळी प्रशासन आणि चुकीचे इंजेक्शन देणार्‍यावर कडक कारवाई करण्याची मागणी योगेश चिले, पराग बालड यांनी केली आहे. याबाबत एमजीएम रुग्णालयाच्या प्रशासनाशी संपर्क साधला असता संपर्क होऊ शकला नाही.