मोबाईलवरून होणार खताचे बुकींग; लाभ घेण्याचे कृषी विभागाचे आवाहन
| नागोठणे | प्रतिनिधी |
जिल्ह्यातील शेतकऱ्यांना खताचा साठा उपलब्ध आहे की, नाही याची खातरजमा करण्यासाठी कृषी केंद्रावर फेऱ्या माराव्या लागत होत्या. त्यामुळे शेतकऱ्यांचा वेळ व पैसा दोन्ही वाया जात होते. त्यामुळे केंद्र शासनाच्या कृषी विभागाकडून खत खरेदी व विक्रीसाठी “फ्रेमवर्क फॉर फर्टिलायझर सेल” ही प्रणाली लागू करण्यात आली आहे. त्यामुळे आता शेतकऱ्यांना आपल्या मोबाईल ॲपच्या माध्यमातून घरी बसून स्वतःच्या आवश्यकतेप्रमाणे व हव्या त्या खत विक्रेत्याकडून खताची खरेदी करता येणार आहे. त्यामुळे रोहा तालुक्यातील जास्तीत जास्त शेतकऱ्यांनी या सेवेचा लाभ घ्यावा, असे आवाहन राज्य शासनाच्या रोहा तालुका कृषी विभागातर्फे करण्यात आले आहे.
शेतकऱ्यांना खताची उपलब्धता, ऑनलाईन बुकींग व वितरण प्रक्रिया अधिक सुलभ, पारदर्शक आणि शेतकरी हिताची करण्यासाठी “फ्रेमवर्क फॉर फर्टिलायझर सेल” हे ॲप्लीकेशन विकसित केले आहे. शेतकऱ्यांनी आपल्या मोबाईलवरून हे ॲप्लीकेशन डाऊनलोड करावे. मोबाईल ॲपद्वारे फार्मर आयडी किंवा आधारकार्ड लॉगिन करून शिफारशी प्रमाणे आवश्यक ते खत निवड करावी. तसेच, खत उपलब्ध असणाऱ्या जवळच्या कृषी केंद्राची निवड करून बुकींग केल्यानंतर कोड किंवा टोकन नंबर मिळेल. तो नंबर जतन करून कृषी केंद्राकडे जावून खत खरेदी करता येते. हा कोड किंवा टोकन नंबर दोन दिवस वैध राहील. वेळेत खत घेवू शकला नाही तर हा कोड किंवा टोकन नंबर रद्द करून पुन्हा बुकींग करता येते. तसेच, बुकींग नंतर तुम्ही स्वतः खत खरेदीसाठी जावू शकत नसल्यास तुमच्यावतीने दुसरी व्यक्ती (प्रतिनिधी) खत आणू शकते. जर स्मार्ट फोन नसल्यास जवळच्या सीएससी सेंटर किंवा रासायनिक खत विक्रेत्यांकडून बुकींग करता येते. त्यासाठी फार्मर आयडी, आधार कार्ड, जमीन/पिकाची माहिती आवश्यक असते. फार्मर आयडी नसल्यास आधार क्रमांकाद्वारे बुकिंग करता येते. जिल्ह्यात सध्या पुरेसे खत उपलब्ध असून, खताची कुठलीही कमतरता भासणार नाही, याबाबत कृषी विभागाने पूर्ण नियोजन केले आहे.
कृषी विभागामार्फत आवश्यक पूर्वतयारी
शेतकऱ्यांनी आपल्या फार्मर आयडी व आधार क्रमांकाच्या आधारे मोबाईल वरून खताची बुकींग करून कोड किंवा टोकन नंबर द्वारे खते खरेदी करावे. यासाठी रायगड जिल्ह्यात “फ्रेमवर्क फॉर फर्टिलायझर सेल” प्रणाली प्रभावीपणे कार्यान्वित करण्यासाठी कृषी विभागामार्फत आवश्यक पूर्वतयारी करण्यात येत आहे. त्यासाठी जिल्हास्तरावरील/तालुका क्षेत्रीय स्तरावरील अधिकारी कर्मचारी तसेच कृषि निविष्ठा विक्रेत्यांचे प्रशिक्षण घेण्यात येत आहे. ऑनलाईन अर्ज, खताची उपलब्धता तपासणी, बुकींग अथवा खत वितरणासंदर्भात कोणतीही अडचण आल्यास तालुका कृषी अधिकारी गुणनियंत्रण निरीक्षक यांच्याशी संपर्क साधता येईल.