टीडब्लूजे कंपनीकडून लाखोंची फसवणूक

चौघांविरोधात गुन्हा दाखल

| चिपळूण | प्रतिनिधी |

चिपळूण येथील टीडब्लूजे असोसिएट्स कंपनीच्या चार प्रतिनिधींनी गुंतवणुकीवर भरघोस परतावा देण्याचे आमिष दाखवून एका व्यक्तीची आणि त्यांच्या बहिणीची 28 लाख 50 हजार रुपयांची फसवणूक केली आहे. या प्रकरणी पीडित व्यक्तीने पोलिसात तक्रार दाखल केली असून चार संशयीतांविरोधात विरोधात गुन्हा दाखल करण्यात आला आहे. ही घटना जानेवारी 2023 पासून आजपर्यंत चिपळूण शहरातील इंटक भवन, पागमळा येथील टीडब्लूजे असोसिएट्सच्या कार्यालयात घडली.

याप्रकरणी प्रतिक दिलीप माटे (वय 29, रा. कामथे) यांनी चिपळूण पोलीस ठाण्यात तक्रार दाखल केली आहे. यानुसार समीर नार्वेकर (रा. गुहागर), त्याची पत्नी नेहा नार्वेकर (रा. गुहागर), संकेश घाग (रा. चिपळूण) आणि सिद्धेश कदम (रा. कामथे, चिपळूण) या चौघांविरुद्ध फसवणुकीचा गुन्हा दाखल केला आहे.
मिळालेल्या माहितीनुसार, आरोपी समीर नार्वेकर आणि त्याची पत्नी नेहा यांनी त्यांची कंपनी ‌‘टीडब्लूजे असोसिएट्स‌’चे प्रतिनिधी म्हणून संकेश घाग आणि सिद्धेश कदम यांच्यामार्फत प्रतिक माटे यांचा विश्वास संपादन केला. त्यांनी गुंतवणुकीवर दर महिन्याला 3 ते 4 टक्के परतावा देण्याचं मोठे आमिष दाखवलं. या आमिषाला बळी पडून प्रतिक माटे यांनी स्वतः 3 लाख 50 हजार रुपये आणि त्यांची बहीण तृप्ती दिलीप माटे यांनी 25 लाख रुपये, अशी एकूण 28 लाख 50 हजार रुपयांची गुंतवणूक या कंपनीत केली. जानेवारी 2023 पासून ते आजपर्यंत ही गुंतवणूक करण्यात आली. मात्र, मे 2025 नंतर कंपनीने त्यांना कोणताही परतावा दिला नाही. वारंवार पाठपुरावा करूनही त्यांची मूळ रक्कमही परत मिळाली नाही. त्यामुळे फसवणूक झाल्याचे लक्षात येताच प्रतिक माटे यांनी पोलिसात तक्रार दाखल केली.