रेवदंडा येथे मुत्थुत फायनान्सच्या नावाखाली 90 लाखांची फसवणूक

| अलिबाग | विशेष प्रतिनिधी |
अलिबाग तालुक्यातील रेवदंडा येथे मयुरेश प्रवीण नागावकर (25, रा. रेवदंडा बाजारपेठ, ता. अलिबाग, जि-रायगड) याने फसवणूक केली असल्याची तक्रार भूषण दत्तात्रेय घरत (34, व्यवसाय- रियल इस्टेट डेव्हलपिंग राहणार रामेश्‍वर मंदिरशेजारी, जोशी आळी, चौल, ता. अलिबाग, जि. रायगड) यांनी रेवदंडा पोलीस ठाण्यात दिली आहे.

याबाबतचे वृत्त असे की, रेवदंडा ग्रामपंचायत हद्दीतील रेवदंडा बाजारपेठ येथे राहणारा मयुरेश प्रवीण नागावकर याने 20 नोव्हेंबर 2021 ते दि. 31 डिसेंबर 2021 दरम्यान फिर्यादी भूषण दत्तात्रेय घरत यांना मुत्थुत फायनान्सबाबतची माहिती पाठवून, मुत्थुत फायनान्समध्ये सोन्याचा लिलाव आहे, याबाबत माहिती दिली. तसेच सोन्याचा लिलाव घेतल्यास तुम्हाला चांगल्याप्रकारे फायदा होईल, तुम्ही जेवढी रक्कम गुंतवाल, तेवढा तुमचाच 15 दिवसांत फायदा होईल, 15 दिवसांत तुमची मुद्दल व फायद्याची रक्कम मिळणार आहे, असे सांगून फिर्यादी व साक्षीदार यांच्याकडून 90 लाख 44 हजार रुपयांच्या रकमा रोखीने व बँकेद्वारे स्वीकारुन सदरची मुद्दल रक्कम व फायद्याची रक्कम आजपर्यंत न देता फियादी व साक्षीदार यांची आर्थिक फसवणूक केली. याबाबत रेवदंडा पोलीस ठाणे येथे गुन्हा दाखल करण्यात आला असून, अधिक तपास पोलीस निरीक्षक अशोक थोरात करीत आहेत. या प्रकरणात आरोपींना वाचविण्यासाठी रेवदंडा येथील काही सामाजिक कार्यकर्ते यांच्याकडून पाठराखण होत असल्याची चर्चा रेवदंडासहित रेवदंडा, चौल विभागात रंगली आहे.