| नवीन पनवेल । वार्ताहर ।
विजेचे बिल अपडेट न झाल्याने वीज कापली जाणार असल्याची भीती दाखवून एका सायबर चोराने कामोठे सेक्टर 35 मध्ये राहणार्या एका वृद्धाला मोबाइलवर ‘क्विक सपोर्ट’ हे अँप डाऊनलोड करण्यास सांगून त्यांच्या खात्यातून 94 हजारांची रक्कम परस्पर लांबवल्याची घटना उघडकीस आली आहे. कामोठे पोलिसांनी या प्रकरणी गुन्हा दाखल केला आहे.
तक्रारदार हरिपालसिंग बिश्ता (66) हे कामोठे सेक्टर 35 मध्ये राहण्यास आहेत. त्यांच्या मोबाइल फोनवर एका अज्ञात व्यक्तीने मेसेज पाठवून त्यांच्या घराची वीज कापली जाणार असल्याचे तसेच त्याआधी बिल भरण्यास किंवा त्यामध्ये दिलेल्या मोबाइल नंबरवर फोन करण्यास सांगितले. त्यामुळे हरिपाल सिंग यांनी त्या मोबाइल नंबरवर फोन केला असता, समोरील व्यक्तीने कामोठे सेक्टर 17 मधील महावितरणच्या कार्यालयातून बोलत असल्याचे भासवून त्यांचे विजेचे बिल भरले नसल्याचे सांगितले.
मात्र हरपाल सिंग यांनी वीजबिल भरल्याचे सांगितल्यानंतर समोरच्या व्यक्तीने त्यांनी भरलेले बिल अपडेट करण्यासाठी त्यांच्या खात्यातून 10 रुपये भरण्यास सांगितले. तसेच, पैसे पाठविण्यासाठी त्यांना मोबाइलवर क्विक सपोर्ट हे अँप डाऊनलोड करण्यास सांगितले. त्यानुसार हरपालसिंग यांनी अँप डाऊनलोड करून त्यावरून सायबर चोराला 10 रुपये पाठवून दिले. त्यानंतर हरपाल सिंग सायबर चोरासोबत फोनवर बोलत असतानाच सायबर चोराने हरपालसिंग यांच्या दोन्ही बँक खात्यांतून 94 हजार रुपयांची रक्कम काढली.
वीज ग्राहकाला गंडा
![](https://krushival.in/grygrars/2021/11/crime-photo-3.jpg)