अल्पवयीन मुलीचे अपहरण करणारा गजाआड

पनवेल तालुका पोलिसांची कामगिरी
। पनवेल । वार्ताहर ।
एका 13 वर्षीय अल्पवयीन मुलीचे अपहरण करत, तिला लपवून ठेवून गुवाहाटी आसाम येथे पळवून नेण्याच्या तयारीत असलेल्या इसमाला पनवेल तालुका पोलिसांच्या सतर्कतेमुळे गजाआड करण्यास यश आले आहे. पोलिसांनी अवघ्या 48 तासांत ही कामगिरी पार पाडली आहे.
तालुक्यातील हावरे बिल्डिंग, पडघे, पनवेल, येथून कोणीतरी अज्ञात इसमाने अल्पवयीन मुलीला फूस लावून अपहरण केले असल्याची तक्रार पनवेल तालुका पोलीस ठाण्यात दाखल करण्यात आली होती. यानुसार वरिष्ठ पोलिस निरीक्षक रविंद्र दौंडकर यांच्या मार्गदर्शनाखाली गुन्हे शाखेचे पोलिस उपनिरीक्षक संजय गळवे, पोलीस उपनिरीक्षक भरत पाटील, पोलीस हवालदार महेश धुमाळ, पोलीस हवालदार सुनिल कुदळे, पोलीस नाईक पंकज चंदीले, पोलीस नाईक प्रकाश मेहेर, महिला पोलीस नाईक आरती लाड यांनी गुन्ह्याचे गांभीर्य लक्षात घेऊन कोणताही धागादोरा नसताना कौशल्याने तपास करण्यास सुरवात केली.
अपहृत मुलीचे मोबाईलचे सीडीआर प्राप्त करण्यात आले व अवलोकन केले असता एक इसम अपहृत मुलीस सतत कॉल करीत असल्याचे निर्दशनास आले. दरम्यान संशयित आरोपी संजीप बरदोलोई याचे सीडीआर प्राप्त झाल्यानंतर संशियत आरोपी संजिप बरदोलोई व अपहरीत मुलगी यांचे सीडीआर एकत्रित करून तांत्रिक तपास केला असता त्यामध्ये एक कॉमन कॉलर गुन्ह्याचे दिवशी दोघांचे संपर्कात असल्याचे निष्पन्न झाले. या इसमास प्रथम ताब्यात घेऊन अधिक तपास करता त्याने गुवाहाटी, आसाम येथे राहणारा सजीप बरदोलोई (22) याने अल्पवयीन मुलीचे अपहरण करून तीस तोंडरे, तळोजा, पनवेल येथे लपवून ठेवले आहे व नंतर ते गुवाहाटी, आसाम येथे जाणार आहेत असे सांगितले. तपासाअंती मुलीला पालकांच्या हवाली देण्यात आले आहे.