अंगारकी संकष्टीसाठी गणपतीपुळे सज्ज

सव्वाशे पोलिस नियुक्त, 70 हजार भक्त दाखल
। रत्नागिरी । वृत्तसंस्था ।
कोरोनातील निर्बंध उठल्यानंतरची पहिली अंगारकी संकष्टी मंगळवारी (ता. 19) आहे. त्यासाठी प्रशासन सज्ज झाले असून, उन्हाळी सुट्यांमुळे 70 हजार भक्त गणपतीपुळेत दाखल होण्याची शक्यता आहे. वाहतूक कोंडीसह गैरसोय टाळण्यासाठी प्रशासन सज्ज झाले आहे. तहसीलदार, पोलीस, मंदिर देवस्थान आणि ग्रामपंचायतींकडून गणपतीपुळेमध्ये नियोजन केले आहे.
कोरोनातील निर्बंधांमुळे मागील दोन वर्षांतील अंगारकीला भक्तगणांना मनासारखे दर्शन घेता आलेले नव्हते. गतवर्षी गणपतीपुळे मंदिर दर्शनासाठी खुले होते, मात्र किनार्‍यावर जाण्यास मज्जाव केला होता. अनेक पर्यटक दर्शन घेऊन तसेच माघारी परतले. अपेक्षित अशी गर्दीही झालेली नव्हती. त्यामुळे स्थानिक व्यावसायिकांचा हिरेमोड झाला. यंदा निर्बंध उठलेले असून अनेक शाळांच्या परिक्षाही संपत आलेल्या आहेत. जोडून शासकीय सुट्ट्या आल्यामुळे पर्यटकांचा गणपतीपुळेतील राबता वाढणार आहे. मंगळवारी होणार्या अंगारकी उत्सवाला 70 हजार भक्तगण दाखल होतील, असा अंदाज आहे. त्यानुसार नियोजन करण्यासाठी प्रांताधिकारी डॉ. विकास सुर्यवंशी, तहसीलदार शशिकांत जाधव, जयगड सहाय्यक पोलिस निरीक्षक जे. एच. कळेकर, देवस्थानचे डॉ. विवेक भिडे, ग्रामपंचायतीचे पदाधिकारी आणि अन्य अधिकारी उपस्थित होते.
किनार्‍यावर गर्दी होण्याची शक्यता आहे. त्यानुसार दहा जीवरक्षक किनार्‍यावर नेमा अशा सूचना ग्रामपंचायतीला देण्यात आल्या आहेत. सध्या चार जणांची नियुक्ती केली आहे. त्याचबरोबर पोलिसांनी सागर रक्षक दलाचे सदस्य आणि पोलीस मित्र यांनाही सतर्क राहण्याच्या सूचना दिल्या आहेत. पोलिसांचा अधिकचा बंदोबस्त किनार्‍यावर ठेवण्यात येईल, असे कळेकर यांनी सांगितले. वीजपुरवठा अखंडित ठेवण्याच्या सूचना महावितरणला बैठकीत केलेल्या आहेत. रत्नागिरीतून गणपतीपुळेकडे येणार्‍या भक्तांसाठी सहा जादा फेर्‍यांचे नियोजन करण्यात येणार असल्याचे एसटी महामंडळाकडून सांगण्यात आले.

सव्वाशे पोलीस नियुक्त
गर्दी झाल्यास वाहतूक कोंडी टाळण्यासाठी तीन ठिकाणी वाहनतळाची सोय केली आहेत. यामध्ये रत्नागिरीकडून येणारी वाहने आठवडा बाजार, सागरदर्शन येथे थांबवली जातील, चाफे रोडवरुन येणारी वाहने महालक्ष्मी हॉलजवळ तर मालगुंडकडून येणारी वाहने खारभुमीचं मैदान किंवा एसटी बसस्थानकाजवळ उभी करण्याची व्यवस्था केली जाईल. पोलिसांचा तेथे बंदोबस्तही ठेवण्यात येणार आहे. अधिकारी, कर्मचार्‍यांसह शंभर ते सव्वाशे पोलिस गणपतीपुळेत 19 एप्रिलला नियुक्त केले जाणार आहेत.