नायब सुभेदार बलराजला सुवर्णपदक

| नवी दिल्ली | वृत्तसंस्था |

इंडियन आर्मीमध्ये नायब सुभेदार आणि पॅरिस ऑलिम्पिकमध्ये पदार्पण करणारे, हरियाणातील कैमला गावाचे बलराज पंवार यांनी पुन्हा एकदा राज्याचे नाव राष्ट्रीय स्तरावर उज्वल केले आहे. बलराज यांनी सीनियर नॅशनल रोइंग चॅम्पियनशिपमध्ये सुवर्णपदक जिंकले. या चॅम्पियनशिपमध्ये बलराज यांनी 7 मिनिटे 12 सेकंदात 2000 मीटरची शर्यत पूर्ण केली. बलराज यांनी सोशल मीडियाच्या माध्यमातून आपल्या या यशाची माहिती शेअर केली.

गेल्या 27 जानेवारी ते 1 फेब्रुवारीपर्यंत पुण्यात सीनियर नॅशनल रोइंग चॅम्पियनशिप झाली. या चॅम्पियनशिपमध्ये बलराज यांनी आपले कौशल्य दाखवले आणि सुवर्णपदकावर कब्जा केला. सुवर्णपदक विजेता बलराज पंवार यांनी सांगितले की, पुण्यात आयोजित रोइंग चॅम्पियनशिपमध्ये 18 स्पर्धकांनी भाग घेतला होता. ज्यात माझी वेळ 7 मिनिटे 12 सेकंद होती. त्यांनी आर्मी सर्व्हिसेसकडून भाग घेतला होता. दुसऱ्या स्थानावर इंडियन आर्मी राहिली आणि तिसऱ्या स्थानावर हरियाणा राहिला आणि चौथ्या स्थानावर झारखंड राहिला होता. बलराज यांनी सांगितले की, रोइंगमध्ये हवा आणि पाण्याची धारदेखील विजय आणि पराभवावर परिणाम करते. ज्यामुळे जास्त वेळ लागतो. बलराज यांचे म्हणणे आहे की, त्यांनी पॅरिस ऑलिम्पिकमध्ये पदार्पण केले होते, परंतु ते पदक जिंकू शकले नाही, पण आता त्यांचे पूर्ण लक्ष एशियन गेम्स आणि ऑलिम्पिकवर आहे.

बलराज पंवार हे करनाल जिल्ह्यातील कैमला गावचे रहिवासी आहेत. 10 वर्षांचे असताना त्यांचे वडील रणधीर पंवार यांचे निधन झाले. आई कमला पंवार यांनी भाजीपाला आणि दूध विकून, बांधकाम आणि कपड्यांच्या कारखान्यात काम करून बलराज आणि त्यांच्या चार भावंडांचे पालनपोषण केले. बलराज विवाहित असून त्यांना एक मूल आहे. 2018 मध्ये ते भारतीय सैन्यात शिपाई म्हणून भरती झाले. सध्या ते नायब सुभेदार आहेत. ऑक्टोबर 2021 पासून ते पुण्यातील आर्मी रोइंग नोडमध्ये प्रशिक्षण घेत आहेत.

बलराज यांनी सैन्यात आपल्या 6 फूट उंचीमुळे रोइंग सुरू केले आणि पहिल्याच प्रयत्नात बटालियन रेगाटा जिंकले. त्यांची प्रगती खूप वेगाने झाली – फक्त 4-5 वर्षांत ते आंतरराष्ट्रीय स्तरावर पोहोचले. ते भारतीय रोइंगचे एमएस धोनी म्हणून ओळखले जातात, कारण ते शांत आणि आत्मविश्वासाने परिपूर्ण असतात. त्यांनी राष्ट्रीय आणि आंतरराष्ट्रीय स्पर्धांमध्ये भाग घेऊन देशाचा गौरव वाढवला आहे. आशिया-ओशनिया ऑलिम्पिक क्वालिफायरमध्ये कांस्यपदक जिंकून पॅरिस 2024 साठी भारताचा पहिला रोइंग कोटा मिळवला. पॅरिस ऑलिम्पिक 2024 मध्ये पुरुष सिंगल स्कल्समध्ये भारताचे प्रतिनिधित्व केले.