ग्रामपंचायत पोटनिवडणुकांसाठी लगबग

उमेदवारी अर्ज भरण्याला वेग

| रायगड | जिल्हा प्रतिनिधी |

रायगड जिल्ह्यातील 127 ग्रामपंचायतींमधील 30 सरपंच आणि 170 सदस्यपदांसाठी पोटनिवडणुका जाहीर झाल्या असून, या पार्श्वभूमीवर उमेदवारी अर्ज भरण्याची प्रक्रिया वेगाने सुरू झाली आहे. एकूण 200 जागांसाठी होणाऱ्या या निवडणुकांचे मतदान 28 एप्रिल रोजी होणार आहे. उमेदवारी अर्ज भरण्यास शनिवार (दि. 4) पासून सुरुवात झाली असून, विविध राजकीय पक्षांचे कार्यकर्ते आणि इच्छुक उमेदवार अर्ज भरण्यासाठी सक्रिय झाले आहेत. निवडणूक प्रक्रिया सुरळीत पार पाडण्यासाठी प्रशासकीय यंत्रणाही सज्ज झाली आहे.

उरण तालुका वगळता जिल्ह्यातील उर्वरित 14 तालुक्यांतील ग्रामपंचायतींमध्ये या पोटनिवडणुका होणार आहेत. अलिबाग तालुक्यातील सहा ग्रामपंचायतींमध्ये 10 सदस्य आणि 1 थेट सरपंच अशा 11 जागांसाठी निवडणूक होणार आहे. मुरुडमध्ये सहा ग्रामपंचायतींमध्ये 15 सदस्यपदांसाठी लढत होईल, तर पनवेलमध्ये दोन ग्रामपंचायतींमध्ये दोन सदस्यपदांसाठी निवडणूक होणार आहे.

कर्जत तालुक्यात चार ग्रामपंचायतींमध्ये सहा सदस्य, खालापूरमध्ये पाच ग्रामपंचायतींमध्ये सहा सदस्य आणि एक सरपंच अशा सात जागा, रोहा येथे दोन ग्रामपंचायतींमध्ये पाच सदस्य, माणगावमध्ये 16 ग्रामपंचायतींमध्ये 15 सदस्य व दोन थेट सरपंच अशा 17 जागा, सुधागड (पाली) मध्ये सहा ग्रामपंचायतींमध्ये सात सदस्य व एक सरपंच अशा आठ जागा, तळा येथे सहा ग्रामपंचायतींमध्ये 14 सदस्य पदांसाठी निवडणूक होणार आहे.

महाडमध्ये 31 ग्रामपंचायतींमध्ये 33 सदस्य व 13 थेट सरपंच अशा एकूण 46 जागा, पोलादपूरमध्ये 17 ग्रामपंचायतींमध्ये 17 सदस्य व पाच सरपंच अशा 22 जागा, श्रीवर्धनमध्ये आठ ग्रामपंचायतींमध्ये 19 सदस्य व तीन सरपंच अशा 22 जागा, तर म्हसळा तालुक्यात 11 ग्रामपंचायतींमध्ये 12 सदस्य व दोन सरपंच अशा 14 जागांसाठी निवडणूक होणार आहे.

अलिबाग तालुक्यातील नवेदर नवगाव, कोप्रोली, रेवदंडा, वैजाळी, खंडाळे आणि नागाव या सहा ग्रामपंचायतींमध्ये पोटनिवडणुका होणार आहेत. यामध्ये एक सरपंच पद व दहा सदस्यपदांसाठी मतदान होणार आहे. नवेदर नवगावमध्ये थेट सरपंच पदासाठी निवडणूक होणार असून, इतर ग्रामपंचायतींमध्ये सदस्यपदांसाठी निवडणूक घेतली जाणार आहे.

दरम्यान, उमेदवारी अर्ज भरण्याची अंतिम तारीख 13 एप्रिल असून, त्यामुळे अर्ज भरण्यासाठी मर्यादित कालावधी शिल्लक राहिला आहे. 15 एप्रिल रोजी अर्जांची छाननी, 17 एप्रिल रोजी माघार प्रक्रिया आणि त्याच दिवशी अंतिम उमेदवारांची यादी जाहीर केली जाणार आहे. 28 एप्रिल रोजी सकाळी साडेसात वाजल्यापासून मतदान प्रक्रिया सुरू होणार असून, मतमोजणी 29 एप्रिल रोजी केली जाणार आहे.

अलिबागमध्ये अकरा अर्ज दाखल
अलिबाग तालुक्यातील सहा ग्रामपंचायतींमधील पोटनिवडणुकांसाठी उमेदवारी अर्ज दाखल करण्यास सुरुवात झाली असून, आतापर्यंत एकूण 11 अर्ज प्राप्त झाले आहेत. यामध्ये एक सरपंच पदासाठी आणि दहा सदस्य पदांसाठी अर्जांचा समावेश आहे. नवेदर नवगाव ग्रामपंचायतीमध्ये सरपंच व एक सदस्य अशा दोन जागांसाठी निवडणूक होणार आहे. कोप्रोलीमध्ये पाच सदस्य, रेवदंडामध्ये एक सदस्य, वैजाळीमध्ये एक सदस्य, खंडाळेमध्ये एक सदस्य आणि नागावमध्ये एक सदस्य पदासाठी निवडणूक घेतली जाणार आहे. या निवडणुकांमध्ये विविध जागा आरक्षणानुसार राखीव ठेवण्यात आल्या आहेत. खंडाळेमध्ये सर्वसाधारण महिला, नागावमध्ये सर्वसाधारण, रेवदंडामध्ये अनुसूचित जमाती स्त्री, वैजाळीमध्ये सर्वसाधारण, नवेदर नवगावमध्ये अनुसूचित जमाती स्त्री, तसेच कोप्रोलीमध्ये अनुसूचित जमाती, अनुसूचित जमाती स्त्री आणि सर्वसाधारण अशा प्रवर्गांसाठी जागा राखीव ठेवण्यात आल्या आहेत, अशी माहिती अलिबाग तहसील कार्यालयाकडून देण्यात आली आहे.