नवी मुंबई आंतरराष्ट्रीय विमानतळावर फेडेक्स हबचे भूमिपूजन

| पनवेल | ग्रामीण प्रतिनिधी |

नवी मुंबई आंतरराष्ट्रीय विमानतळावर जागतिक कुरिअर आणि लॉजिस्टिक्स क्षेत्रातील अग्रगण्य कंपनी फेडेक्स यांच्या हब उभारणीसाठी बुधवारी (दि.18) उत्साहात भूमिपूजन सोहळा पार पडला. हा महत्त्वाकांक्षी प्रकल्प अदानी एअरपोर्ट होल्डिंग्स लिमिटेड यांच्या सहकार्याने साकारला जाणार आहे.

या प्रकल्पाचे भूमिपूजन महाराष्ट्राचे मुख्यमंत्री देवेंद्र फडणवीस यांच्या हस्ते करण्यात आले. यावेळी बोलताना त्यांनी सांगितले की, नवी मुंबई आंतरराष्ट्रीय विमानतळावर उभारला जाणारा फेडेक्स हब राज्यातील लॉजिस्टिक्स आणि कार्गो क्षेत्रासाठी ‌‘गेमचेंजर’ ठरेल. या प्रकल्पामुळे मोठ्या प्रमाणात रोजगारनिर्मिती होईल तसेच औद्योगिक विकासालाही चालना मिळेल, असा विश्वास त्यांनी व्यक्त केला. तसेच, हा अत्याधुनिक हब जागतिक मालवाहतूक साखळीला बळकटी देणार असून नवी मुंबईला आंतरराष्ट्रीय लॉजिस्टिक्स नकाशावर महत्त्वाचे स्थान मिळवून देईल, असेही यावेळी नमूद करण्यात आले. या कार्यक्रमाला सिडकोचे व्यवस्थापकीय संचालक विजय सिंगल, फेडेक्सचे मुख्य कार्यकारी अधिकारी राज सुब्रमणयम, आमदार गणेश नाईक, मंदा म्हात्रे यांच्यासह विविध क्षेत्रातील मान्यवर, अधिकारी व प्रतिनिधी मोठ्या संख्येने उपस्थित होते. नवी मुंबईच्या विकासाच्या दृष्टीने हा प्रकल्प मैलाचा दगड ठरणार असल्याची चर्चा कार्यक्रमस्थळी रंगली होती.