अनघा पाटील आत्महत्येचे गुजरात कनेक्शन

बँकेचे व्यवहार पाहिल्यावर धक्कादायक माहिती समोर

| नवी मुंबई | प्रतिनिधी |

गुजरातमधील एका व्यक्तीने फॉरेक्स मार्केटमध्ये गुंतवणूक करण्याच्या नावाखाली तब्बल 5.30 कोटी रुपयांची फसवणूक केली. या फसवणुकीमुळे आलेल्या नैराश्यातून पनवेलमध्ये राहणाऱ्या अनघा पाटील (36) यांनी आत्महत्या केली. पनवेल शहर पोलिसांनी रवी हरेशभाई भडका याच्याविरोधात आत्महत्येस प्रवृत्त केल्याचा गुन्हा दाखल केला असून, त्याचा शोध सुरू आहे.

अनघा पाटील यांची 2023 मध्ये एका ऑनलाइन कोर्सदरम्यान आणि दिल्ली येथे ऑफलाइन कोर्सदरम्यान रवी भडका याच्याशी ओळख झाली होती. या ओळखीचा फायदा घेत, गेल्या वर्षी जुलैमध्ये भडकाने अनघा यांची भेट घेतली. त्याने फॉरेक्स मार्केटमधील गुंतवणुकीबद्दल माहिती दिली आणि त्याला चांगला नफा मिळत असल्याचे सांगितले. यामुळे अनघा यांनी त्याची आपल्या कुटुंबीयांशी ओळख करून दिली. अनघा पाटील आणि त्यांच्या कुटुंबीयांनी रवी भडका याच्यावर विश्वास ठेवून काही रक्कम गुंतवली. सुरुवातीला त्याने थोडा परतावा देऊन त्यांचा विश्वास आणखी वाढवला. त्यानंतर, त्याने अनघा, त्यांचे वडील, भाऊ आणि पती या सर्वांकडून गुंतवणुकीच्या बहाण्याने कोट्यवधी रुपये उकळले. मात्र, गेल्या वर्षभरात त्याने कोणताही परतावा दिला नाही.

यादरम्यान, 8 ऑक्टोबर रोजी अनघा पाटील यांनी राहत्या घरात गळफास घेऊन आत्महत्या केली. त्यांच्या मृत्यूनंतर नातेवाईक आणि मित्रमंडळींनी त्यांच्या वडिलांची भेट घेतली. त्यावेळी त्यांनी सांगितले की, अनघा त्यांच्याकडे लाखो रुपयांची मागणी करत होती. अनघा यांच्या कुटुंबीयांनी त्यांच्या बँक खात्याची तपासणी केली असता, धक्कादायक माहिती समोर आली. त्यांच्या खात्यातून तब्बल 38 लाख रुपये रवी भडका याला पाठवण्यात आले होते. तसेच, आरोपीने अनघा यांचे वडील, भाऊ आणि पती यांच्याकडून एकूण पाच कोटी 30 लाख रुपये फसवणुकीतून उकळल्याचे उघडकीस आले.

आरोपी भडकाने गेल्या वर्षभरात कोणताही परतावा दिला नाही. उलट, त्याने अनघा पाटील यांच्याकडे वारंवार पैशांची मागणी करून त्यांना त्रास देण्यास सुरुवात केली होती. यामुळेच अनघा पाटील यांनी नातेवाईक आणि मित्रमंडळींकडून लाखो रुपयांची मागणी केली असावी, हे त्यांच्या कुटुंबीयांच्या लक्षात आले.
रवी भडका याच्या आर्थिक फसवणुकीमुळे आलेल्या नैराश्यातून आणि त्याच्या त्रासाला कंटाळून अनघा पाटील यांनी आत्महत्या केली, हे लक्षात आल्यानंतर त्यांच्या वडिलांनी शुक्रवारी पनवेल शहर पोलिस ठाण्यात तक्रार दाखल केली. पोलिसांनी आत्महत्येस प्रवृत्त केल्याचा गुन्हा दाखल करून आरोपी भडका याचा शोध सुरू केला आहे.