हापूसवर गुजरातचे अतिक्रमण

| मुंबई | प्रतिनिधी |

कोकणातील अस्सल हापूस आंब्यावर आता भौगोलिक मानांकनावरून मोठे संकट उभे राहिले आहे. गुजरातने या आंब्यावर दावा करत ‌‘वलसाड हापूस‌’ नावाने भौगोलिक मानांकन मिळवण्यासाठी अर्ज केला आहे. त्यामुळे कोकणातील आंबा बागायतदारांची चिंता वाढली आहे. त्यावर आता राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी लक्ष वेधले आहे. सरकारने यामध्ये लक्ष घालावे आणि कोकणातील आंबा उत्पादकांचे संरक्षण करावे. तसेच, कोकणातील सत्ताधारी नेत्यांनीही हा प्रश्न लावून धरावा, ही विनंती त्यांनी सोशल मिडीयावर पोस्ट शेअर करत केली आहे.

रोहित पवार यांनी म्हटले आहे की, कोकण शब्द उच्चारताच नकळत पुढे हापूस शब्द निघतो. कोकण हापूसला संपूर्ण जगातून मागणी आहे आणि येथील शेतकऱ्यांनी अत्यंत कष्टाने हापूसला जपल आहे. हापूस म्हणजे येथील शेतकऱ्यांचे जगण्याचे साधन आहे. कोकणातील सर्वाधिक मोठी उलाढाल ही हापूसच्या माध्यमातून होते. परंतु, गांधीनगर आणि नवसारी विद्यापीठाने 2023 मध्ये वलसाड हापूस नावाने भौगोलिक मानांकन मिळण्यासाठी अर्ज केल्याने कोकण हापूसवर आता मानांकनाचे संकट घोंगावत आहे. सरकारने यामध्ये लक्ष घालावे आणि कोकणातील आंबा उत्पादकांचे संरक्षण करावे. तसेच, कोकणातील सत्ताधारी नेत्यांनीही हा प्रश्न लावून धरावा, अशी विनंती त्यांनी केली आहे.