लाखोंचा गुटखा हस्तगत

। पनवेल । वार्ताहर ।

लाखो रुपये किंमतीचा गुटखा साठा नवी मुंबई पोलिसांच्या अंमली पदार्थ विरोधी पथकाने हस्तगत केला असून याप्रकरणी दोघा जणांवर कारवाई करण्यात आली आहे.

सर्वेशकुमार मोहनलाल मौर्या (22) व शामु शिवगोविंद मौर्या (24) हे दोघे उलवे सेक्टर 23 मध्ये राहणारे असून ते परराज्यातून छुप्या पद्धतीने गुटखा आणून त्याची विक्री पनवेल परिसरात व नवी मुंबई परिसरात करीत असल्याची माहिती नवी मुंबई पोलिसांच्या अंमली पदार्थ विरोधी पथकाला मिळाली. माहितीनुसार अंमली पदार्थ विरोधी कक्षाचे वपोनि संदीप निगडे, सपोनि श्रीकांत नायडु, सचिन कोकरे व त्यांच्या पथकाने या दोघांना सापळा रचून त्यांच्या गाडीसह ताब्यात घेतले. तसेच, त्यांच्या गाडीमध्ये महाराष्ट्र राज्यात प्रतिबंधित असलेला गुटखा, पानमसाला व सुगंधीत तंबाखुचा साठा असा मिळून जवळपास 1 लाख 1 हजार 880 रुपये किंमतीचा माल आढळून आल्याने तो साठा जप्त केला असून या दोघांना ताब्यात घेण्यात आले आहे.