नियोजनाअभावी रस्त्यांवर कचऱ्याचे ढीग

प्लास्टिक, कचरा खाऊन मोकाट गुरांचे आरोग्य धोक्यात
धाटाव ग्रामपंचायत प्रशासनाचे अक्षम्य दुर्लक्ष

| धाटाव | प्रतिनिधी |

रोहा तालुक्यातील धाटाव ग्रामपंचायत हद्दीतील नाक्यावर असलेल्या कचरा कुंडीतील कचरा आणि प्लास्टिक मोकाट गुरे खात असल्याचा धक्कादायक प्रकार समोर आला आहे. ग्रामपंचायत प्रशासनाच्या ढिसाळ आणि नियोजनाअभावी गावातील मुख्य रस्त्यांवर कचऱ्याचे ढीग साचले आहेत. अनेक दिवसांपासून ही कचरा कुंडी साफ न केल्यामुळे कचरा रस्त्यावर पसरला आहे. या पसरलेल्या कचऱ्यात परिसरातील मोकाट जनावरे अन्नाच्या शोधात फिरत आहेत. सुका आणि ओला कचरा एकत्र असल्याने, भूकेपोटी ही निष्पाप जनावरे प्लास्टिक पिशव्यांसह कचरा गिळंकृत करताना दिसत आहेत.

कचरा कुंडीची नियमित स्वच्छता होत नसल्याने तिथे दुर्गंधीचे साम्राज्य पसरले आहे. कचऱ्यामध्ये प्लास्टिक, शिळे अन्न, रिकाम्या दूध पिशव्या, कागदी पुठ्ठे आणि इतर घातक वस्तूंचा समावेश असतो. गायी, बैल आणि इतर मोकाट जनावरे या कचरा कुंडीत तोंड मारतात. प्लास्टिक पोटात गेल्यामुळे अनेक गुरांना पोटदुखी आणि इतर गंभीर आजार होत आहेत. काही ठिकाणी गायीने प्लास्टिक खाल्ल्याने मृत्यू झाल्याच्या घटनाही घडल्या आहेत. या गंभीर समस्येकडे ग्रामपंचायत प्रशासनाचे अद्याप कोणतीही ठोस कारवाई करण्यात आलेली नाही.

नाक्यावर रस्त्यावरून जात असताना आणि हाकेच्या अंतरावर असलेल्या या कचरा कुंडीतील ओव्हरफ्लो कचरा येथील संबंधित अधिकारी, कर्मचारी वर्गाला दिसत हेच विशेष म्हणावे लागेल. नाक्यावरील दुकानातून दूध डेअरी, भाजीवाले, हॉटेल, चायनिज सेंटर, चिकन सेंटर यांतून आलेल्या कचऱ्यामुळे कचरा कुंडी सतत ओव्हरफ्लो असल्याचे चित्र पहावयास मिळत आहे.

उंच कचऱ्या कुंडीत मोकाट गुर ही कचरा कुंडीच्या आतमध्ये उतरून कचरा खाताना पहावयास मिळत आहे. तरी प्रशासनाने जागे व्हावे, याठिकाणी तात्काळ कचरा कुंड्यांची नियमित स्वच्छता करावी आणि मोकाट गुरांचा बंदोबस्त करावा, अशी मागणी येथील सर्वसामान्य नागरिक वर्गातून होत आहे.

कचराकुंडीची अनियमित स्वच्छता
घंटागाडीची सोय नियमित नसल्याने नागरिक कचरा कुंडीतच कचरा टाकतात. मात्र, तो कचरा वेळेवर उचलला जात नाही. कचरा कुंडीची नियमित स्वच्छता होत नसल्याने तिथे दुर्गंधीचे साम्राज्य पसरले आहे. तर मोकाट गुरेही प्लास्टिक खात आहेत. उद्या या प्रकारामुळे मोठी साथ पसरून नागरिकांचे आरोग्य धोक्यात येऊ शकते.