ताह्मिणी घाटात अवतरला स्वर्ग

डोंगरमाथ्यावर दाट धुक्यांची दुलई; पर्यटकांना मोहविणारे सौंदर्य

| सुधागड -पाली | प्रतिनिधी |

परतीच्या पाऊस नुकताच गेला आहे. त्यामुळे जिल्ह्यात मागील काही दिवसांपासून सर्वत्र दाट धुक्याची दुलई पसरत आहे. याशिवाय डोंगरावर विशेषतः ताह्मिणी घाटात पांढर्‍या शुभ्र व करड्या रंगांचे ढग दाटत आहेत. जणूकाही येथे स्वर्गच असल्याचा भास होतो. विमान प्रवास करतांना विमानातून दिसणार्‍या ढगांचा अनुभव येथे मिळत आहे. यातच आजूबाजूला पसरलेल्या गर्द हिरवाईने हा अद्भुत नजारा आणखीच बहारदार होतो. त्यामुळे येथून प्रवासी व पर्यटक सुद्धा ढग, हिरवाई, व धुक्याचा आनंद घेत आहेत.

रायगड, सुधागड, सरसगड, मानगड, सुरगड, मृगगड, विश्रामगड, कर्नाळा आदींसह जिल्ह्यातील इतरही उंचावरील किल्ल्यांवर ढग व धुके पसरलेले असते. त्यामुळे येथे येणारे दुर्गप्रेमी व ट्रेकर्स दुर्गभ्रमंती बरोबरच ढगांची व धुक्याची अनुभूती घेतात. ताजे व प्रफुल्लीत करणारे हे वातावरण सर्वांनाच आकृष्ट करत आहे. त्यामुळे जिल्ह्यात पर्यटन वृद्धी सुद्धा होतांना दिसत आहे.

प्रवासात ढगांची अनुभूती
ट्रेकिंग व पर्यटनासाठी हे वातावरण उत्तम आहे. त्यामुळे बरेचसे ट्रेकर व पर्यटक किल्ले, डोंगर, समुद्रकिनारा आदी ठिकाणी भटकंती करत आहेत आणि या अद्भुत निसर्गाची मज्जा लुटतात. ताह्मिणी घाट, वरंध घाट व मोर्बे घाट येथून प्रवास करतांना ढगांची अनुभूती मिळत आहे. असंख्य पर्यटक येथे आवर्जून थांबून मज्जा लुटत आहेत

डोंगरावर पसरलेले ढग व धुक्यामुळे जिल्ह्यातील वातावरण खुप अल्हाददायक झाले आहे. पहाटे व सकाळी आवर्जून या ढगांचा आणि येथील निसर्ग सौन्दर्याचा मनमुराद आनंद लुटत आहे. ताम्हिणी घाटात उतरलेले ढग व हिरवाई प्रचंड आकर्षित करीत आहे.

दत्तात्रय दळवी
पर्यटक

अनेक पर्यटक व ट्रेकर खास ढग व धुक्याचा आस्वाद घेण्यासाठी येत आहेत. धुक्याची व ढगांची चादर सर्वांचे लक्ष वेधून घेते. किल्ले व डोंगरावरील धुके व ढग अनुभवण्यासाठी असंख्य पर्यटक येत आहेत. शिवाय येथील प्राणीपक्षी व निसर्ग सौन्दर्याचा आनंद लुटत आहेत.

उमेश तांबट
संचालक, सुधागड ट्रेकर्