बोरघाटात भीषण अपघात; कंटेनरची टेम्पोला धडक

कंटेनर चालकाचा जागीच मृत्यू; टेम्पो चालक जखमी

। खोपोली । प्रतिनिधी ।

मुंबई–पुणे द्रुतगती महामार्गावर बोरघाटातील ढेकू गावाच्या हद्दीत सोमवारी (दि.28) सकाळी कंटेनरने समोरील टाटा टेम्पोला पाठीमागून जोरदार धडक दिल्याने भीषण अपघात झाला. धडकेनंतर दोन्ही वाहने महामार्गालगतच्या सुमारे 50 फूट खोल दरीत कोसळली. या दुर्घटनेत कंटेनर चालकाचा जागीच मृत्यू झाला असून, टेम्पो चालक जखमी झाला आहे.

मिळालेल्या माहितीनुसार, उत्तर प्रदेश येथील कंटेनर चालक मोहमद कैफ (24) पुण्याहून मुंबईच्या दिशेने जात होता. बोरघाटातील ढेकू गावाच्या हद्दीत आल्यानंतर कंटेनरवरील चालकाचे नियंत्रण सुटले. यावेळी कंटेनरने पुढे जाणाऱ्या टाटा टेम्पोला पाठीमागून जोरदार धडक दिली. धडकेनंतर दोन्ही वाहने रस्त्याच्या कडेला असलेल्या खोल दरीत कोसळली.

अपघातात कंटेनरच्या केबिनमध्ये चालक मोहमद कैफ अडकला होता. त्याचा जागीच मृत्यू झाला. तर टेम्पो चालक मीराज शेख (29) हा जखमी झाला. अपघाताची माहिती मिळताच बोरघाट महामार्ग पोलीस, आयआरबी यंत्रणा, हेल्प फाउंडेशनचे सदस्य, देवदूत यंत्रणा, डेल्टा फोर्स, महाराष्ट्र सुरक्षा दलाचे जवान, लोकमान्य हॉस्पिटलची रुग्णवाहिका आणि एफकॉन कंपनीची टीम तातडीने घटनास्थळी दाखल झाली. बचाव पथकांनी दरीत उतरून अपघातग्रस्त वाहनांमध्ये अडकलेल्या जखमी टेम्पो चालकाला बाहेर काढले. त्याला पुढील उपचारासाठी खोपोली नगरपालिकेच्या रुग्णालयात दाखल करण्यात आले. अपघातानंतर काही काळ महामार्गावरील वाहतुकीवर परिणाम झाला. घटनास्थळी बचावकार्य आणि वाहने बाहेर काढण्याचे काम करण्यात आले.