अवघ्या सहा मिनिटांत सोनाराला महिलांचा गंडा

| पनवेल | वार्ताहर |

महिलांच्या त्रिकुटाने गिऱ्हाईकाच्या बहाण्याने पनवेल शहरातील एका सोन्याच्या पेढीवरील कर्मचा-यांना बोलण्यात गुंतवून पावणे दोन लाखांना लुटले आहे. रविवारी (दि.15) सकाळी साडेदहा वाजण्याच्या सूमारास ही घटना घडली. याबाबत पनवेल शहर पोलीसांनी रितसर गुन्हा नोंदविला असून पोलीस संशयीत महिलांचा शोध घेत आहेत.

पनवेल शहरातील जोशी आळीतील एच.एम. पटेल ज्वेलर्स या सराफाच्या दूकानात रविवारी सकाळी 10 वाजून 24 मिनिटांनी सोन्याचे कानातले घेण्यासाठी तीन महिला गिऱ्हाईक दूकानात आल्या. त्यावेळी दूकानात दोन कर्मचारी काम करत होते. दोन्ही कर्मचाऱ्यांना बोलण्यात गुंतवून आणि इतर दागिने पहाण्याच्या बहाण्याने या संशयीत महिलांनी 1 लाख 85 हजार रुपयांचे दागीने हातचलाखीने चोरी केली. तीन महिलांमध्ये दोघींचे वय 30 ते 35 वर्षे आणि एकीचे वय 55 ते 60 वर्षे असल्याचा अंदाज पोलीसांना दिलेल्या तक्रारीत सराफ दूकानातील कर्मचाऱ्यांनी पोलीसांकडे वर्तविला आहे. अवघ्या सहा मिनिटांत चोरी करुन या महिला दूकानातून पसार झाल्यामुळे या महिला सराईत चोर असल्याचे बोलले जात आहे.