महसूल कर्मचारी आंदोलनाच्या पावित्र्यात

उद्यापासून बेमूदत काम बंद आंदोलन करणार असल्याचा इशारा

| रायगड | जिल्हा प्रतिनिधी |

महसूल मंत्री यांनी कोणतीही पुर्व सुचना न देता, विना चौकशी चार तहसीलदार, चार मंडळ अधिकारी, व दोन ग्राम महसूल अधिकारी (तलाठी) यांच्याविरोधात निलंबनाची कारवाई केली. भंडारा येथील तत्कालीन उपविभागीय अधिकारी, तहसीलदार यांच्यांविरोधात फौजदारी कारवाई करणे, पालघरमधील मंडळ अधिकारी व ग्राम महसूल अधिकारी यांचेदेखील अन्यायकारक निलंबन करणे अशा अनेक कारणामुळे महसूल अधिकारी व कर्मचारी वर्गात नाराजीचे सुर उमटले आहेत. त्यांच्या विरोधात रायगड जिल्ह्यातील महसूल अधिकारी व कर्मचारी एकवटले आहेत. महाराष्ट्र राज्य महसूल अधिकारी व कर्मचारी समन्वय महासंघ रायगड जिल्ह्याच्यावतीने बुधवारी सायंकाळी जिल्हाधिकारी यांची भेट घेऊन त्यांना निवेदन देण्यात आले आहे. शुक्रवारपासून (दि. 19) बेमुदत काम बंद आंदोलन करण्याचा इशारा या निवेदनातून देण्यात आला आहे.

विधी मंडळातील व विधीमंडळा बाहेरील विनाचौकशी निलंबन सत्र आणि नैसर्गिक न्यायाची पायमल्ली करण्यात आल्याचा आरोप संघटनेच्यावतीने करण्यात आला आहे. महसूलमंत्री यांनी एकतर्फी निलंबनाची कारवाई केली आहे. गौणखनिज कारवाई आणि प्रशासकीय कोंडी होत असल्याचा आरोप करण्यात आला आहे. अवैध गौण खनिज करणाऱ्या गुन्हेगाराचा पाठलाग करणे, हे महसूलविभागाला शक्य नाही. फक्त दंडात्मक कारवाई करण्याचे अधिकार आहेत. तरीदेखील महसूल अधिकारी व कर्मचाऱ्यांना आरोपीच्या पिंजऱ्यात उभे करून कार्यवाही करणे अन्यायकारक आहे. महसूलमंत्री यांनी एका वर्षात 28 नायब तहसीलदार, तहसीलदार, चार उपजिल्हाधिकारी, आठ मंडळ अधिकारी, 14 ग्राम महसूल अधिकारी, सहाय्यक महसूल अधिकारी, व महसूल सहाय्यक यांच्याविरोधात निलंबनाची केलीली कारवाई अन्यायकारक आहे. त्यामुळे महसूल मंत्र्याचा निषेध व्यक्त करीत या विरोधात महसूल अधिकारी व कर्मचारी यांनी आंदोलनाचा पवित्रा घेतला आहे. रायगड जिल्ह्यातील उपजिल्हाधिकारी, तहसीलदार व अन्य अधिकारी व कर्मचारी यांनी जिल्हाधिकारी किशन जावळे यांची भेट घेतली. त्यांना निवेदन देत 19 डिसेंबरपासून प्रलंबित प्रश्नांसाठी बेमूदत काम बंद आंदोलन केले जाणार असल्याचा शािरा दिला.

या आहेत मागण्या

12 व 13 डिसेंबरला सभागृहात जाहीर केलेले निलंबनाचे आदेश मागे घेण्यात यावे. चुकीच्या पध्दतीने निलंबित करण्यात आलेल्या महसूल अधिकारी व कर्मचारी यांना पुर्व पदावर घेण्यात यावे. निलंबनाच्या कार्यवाही आदर्श कार्यप्रणाली निश्चित करण्यात यावी. महसूल विभागातील नायब तहसीलदार यांचे श्रेणी वेतन, महसूल सहाय्यक, ग्राम महसूल अधिकारी मंडळ अधिकारी, सहाय्यक महसूल अधिकारी यांचे वेतन श्रेणीबाबत प्रलंबित प्रस्ताव मान्य करण्यात यावेत. महसूल विभागाचे सर्व संवर्ग कार्यालयाचे सुधारित आकृतीबंध तात्काळ मंजूर करणे.