उरणमध्ये नववर्षाच्या स्वागतासाठी तरुणाई सज्ज

हॉटेल्स, रिसॉर्ट, फार्म हाऊसचे बुकिंग हाऊसफुल्ल

| चिरनेर | प्रतिनिधी |

उरणमध्ये सरत्या वर्षाला अलविदा आणि नववर्षाच्या स्वागताची आतापासूनच तरुणाईची जोरदार तयारी सुरू झाली आहे. त्यामुळे तरुणाईने आखलेल्या प्लानमुळे परिसरातील सर्वच हॉटेल्स, रिसॉर्ट, फार्म हाऊस दहा दिवसांपूर्वीच बुक झाल्याने हाऊसफुल्ल झाली आहेत.

उरमधील रानसई धरण, वेश्वी, विंधणे,आक्का देवीचा डोंगर, इंद्रायणी डोंगर, करंजा परिसर, ऐतिहासिक द्रोणागिरी डोंगर, जेएनपीए परिसर, टाऊनशिप आदी अनेक ठिकाणे तरुणाईची अगदी पसंतीची आहेत. त्याचबरोबर पीरवाडी दर्गा पीरवाडी, माणकेश्वर येथील समुद्राचा फेसाळणारा किनारा, रुपेरी वाळू हौशी पर्यटक व तरुणाईला सदैव साद घालीत असते. त्याचबरोबर मोरा-मुंबई घारापुरीदरम्यान शीतल चांदण्या आणि समुद्र सफरीचा आनंद घेण्यासाठीही दरवर्षी हौशी पर्यटकांची विशेष रेलचेल असते. सरत्या वर्षाला निरोप देण्यासाठी, नवीन वर्षाच्या स्वागतासाठी आणि रात्रभर समुद्र सहलीचा आनंद घेण्यासाठी तरुणाई फारच उत्सुक झाली आहे. यासाठी अनेक बोटींचे बुकिंगही झाले असल्याचे बोट मालकांकडून सांगितले जात आहे.

उरणच्या किनाऱ्यावर आणि परिसरात अनेक हॉटेल्स, रिसॉर्ट, फार्म हाऊस आहेत. कुटुंबियांसह मौजमजा करण्यासाठी असलेल्या या ठिकाणी नेहमीच गर्दी असते. विशेषतः सीफुड, फ्रेश सीफुड, स्थानिक खाद्य पदार्थ आणि इतर आवडीचे रुचकर खाद्य पदार्थ आर्डरप्रमाणे किफायतशीर दरात उपलब्ध करून देण्यात येत आहेत. यामुळे ही सर्वच ठिकाणे दहा दिवसांपूर्वीच बुक झाल्याचे व्यावसायिकांकडून सांगितले जात आहे.