श्रीवर्धन-म्हसळ्यात घरफोड्यांचा कहर

नागरिकांमध्ये भीतीचे वातावरण

| श्रीवर्धन | प्रतिनिधी |

श्रीवर्धन आणि म्हसळा या दोन तालुक्यांमध्ये गेल्या काही दिवसांपासून घरफोड्यांची अक्षरशः मालिका सुरू असून, चोरट्यांनी नागरिकांच्या सुरक्षिततेलाच खुले आव्हान दिले आहे. दिवसाढवळ्या तसेच रात्रीच्या वेळीही निर्भीडपणे घरफोड्या होत असल्याने संपूर्ण परिसरात भीती आणि असुरक्षिततेचे वातावरण निर्माण झाले आहे. कायदा व सुव्यवस्थेचा प्रश्न दिवसेंदिवस गंभीर होत असताना, पोलीस यंत्रणेची निष्क्रियता स्पष्टपणे समोर येत आहे.

चोरट्यांनी अत्यंत नियोजनबद्ध आणि व्यावसायिक पद्धतीने घरांना लक्ष्य केले आहे. घरातील सदस्य बाहेर गेल्याची खात्री करूनच चोरी केली जात आहे. काही ठिकाणी दिवसाढवळ्या खिडकीचे ग्रील तोडून घरफोड्या करण्यात आल्या असून, त्यामुळे नागरिकांमध्ये प्रचंड भीतीसोबतच संतापाची लाट उसळली आहे. अनेक घरांतून लाखो रुपयांचे दागिने, रोख रक्कम आणि इतर मौल्यवान वस्तू लंपास झाल्या आहेत.

स्थानिक नागरिकांनी प्रशासनावर तीव्र शब्दांत नाराजी व्यक्त करत सांगितले की, दररोज चोरीच्या घटना घडत आहेत, मात्र पोलिसांकडून केवळ ‘तपास सुरू आहे’ अशीच प्रतिक्रिया दिली जाते. प्रत्यक्षात कोणतीही ठोस कारवाई दिसून येत नाही. काही भागांमध्ये सलग दोन ते तीन घरफोड्या झाल्याने नागरिकांनी स्वतःहून रात्रभर जागरण करून गस्त घालण्यास सुरुवात केली आहे.

विशेष म्हणजे, अनेक घटनांमध्ये एकाच प्रकारची पद्धत वापरण्यात आल्याने या मागे मोठी संघटित टोळी कार्यरत असल्याची शक्यता वर्तवली जात आहे. सीसीटीव्ही नसलेल्या आणि कमी वर्दळीच्या भागांना टार्गेट केले जात असून, चोरटे अत्यंत चलाखीने आपले कोणतेही ठसे न ठेवता पसार होत आहेत.

दरम्यान, पोलीस प्रशासनाकडून गस्त वाढवण्यात आल्याचे आणि विशेष पथके स्थापन केल्याचे सांगितले जात असले, तरी प्रत्यक्षात परिस्थितीत कोणताही ठोस बदल जाणवत नाही. नागरिकांचा आरोप आहे की, पोलिसांची उपस्थिती केवळ कागदावर मर्यादित राहिली असून, प्रत्यक्षात सुरक्षा व्यवस्थेचा पूर्णपणे अभाव आहे.
या पार्श्वभूमीवर नागरिकांमध्ये भीतीचे सावट अधिकच गडद झाले आहे. श्रीवर्धन पोलीस ठाण्याच्या हद्दीतील कोले गावाजवळील जुनी चेक पोस्ट चौकी तात्काळ पुन्हा सुरू करण्यात यावी, तसेच गावांमध्ये येणाऱ्या फेरीवाल्यांची नोंद अनिवार्य करावी, अशी मागणी आता जोर धरू लागली आहे. स्थानिक पोलीस पाटील यांना याबाबत सक्रिय भूमिका घ्यावी, अशी मागणी करण्यात येत आहे.

तज्ञांच्या मते, जर तात्काळ आणि कठोर पावले उचलली नाहीत, तर येत्या काळात घरफोड्यांचे प्रमाण आणखी वाढू शकते. त्यामुळे पोलिसांनी केवळ आश्वासने न देता तातडीने कारवाई करून आरोपींना जेरबंद करणे अत्यावश्यक आहे.

सतर्क राहण्याचे आवाहन
नागरिकांनीही सतर्क राहण्याचे आवाहन करण्यात आले असले, तरी सुरक्षा देणे ही प्रशासनाची जबाबदारी आहे, असा ठाम आणि आक्रमक सूर आता जनतेतून उमटत आहे. सद्यस्थिती पाहता, श्रीवर्धन-म्हसळा तालुक्यात कायदा व सुव्यवस्था धोक्यात आल्याची भावना अधिक तीव्र होत आहे.