| पनवेल | वार्ताहर |
सध्या बाजारात बटाट्यांची आवक कमी होऊ लागली आहे. मात्र, मागणी वाढल्याने याचा परिणाम पनवेल बाजारपेठेत दिसू लागला असून, बटाट्याच्या दरात वाढ झाली आहे. बाजारात प्रतिकिलो 10-12 रुपयांनी उपलब्ध असलेला बटाटा आता 15 ते 16 रुपयांवर पोहोचला आहे. यापूर्वी फेब्रुवारी महिन्यात बटाट्याचे दर वधारले होते. परंतु; नवीन बटाटा दाखल होताच दर आवाक्यात आले होते. आता पुन्हा एकदा आवक कमी झाल्यामुळे ही दरवाढ झाली आहे. सध्या बाजारात परराज्यातील बटाटा दाखल होत आहे. यामध्ये गुजरात, उत्तरप्रदेश व मध्यप्रदेश या परराज्यातुन बटाट्याची आवक सुरू आहे. पावसाळ्यात बटाट्याची आवक कमी होत असते. त्यामुळे पावसाळ्यापर्यंत बटाटा 20 रूपयांवर जाण्याची शक्यता आहे.