नागपूरमध्ये इंडिगोच्या विमानाचं इमर्जन्सी लँडिंग

| नागपूर | प्रतिनिधी |

नागपूरच्या डॉ.बाबासाहेब आंबेडकर आंतरराष्ट्रीय विमानतळावरून एक खळबळजनक बातमी समोर आली आहे.  यात कोच्चीवरून दिल्लीकडे जाणाऱ्या इंडिगोच्या विमानाने नागपूरमध्ये अचानक इमर्जन्सी लँडिंग केलं आहे. विमानामध्ये बॉम्ब ठेवल्याचे कॉल आल्यानंतर नागपुरात विमानाचे लँडिंग करवण्यात आलं आहे. प्रकरणाचे गांभीर्य लक्ष्यात घेता सध्या विमानाची तपासणी सुरू करण्यात आली आहे. नागपूर पोलीस आणि अग्निशमन दल विमानतळावर दाखल झाले असून विमानाची तपासणी सुरू आहे. मात्र या प्रकरणामुळे एअरपोर्टवर काही वेळ एकच पळापळ आणि गोंधळ उडाल्याचे बघायला मिळाले आहे.  

मिळालेल्या माहितीनुसार, हे विमान सकाळी 9.20 वाजता कोचीहून निघालेले आणि दुपारी 12.35 वाजता दिल्लीत उतरणारे होतं. अशातच विमानातील अधिकाऱ्यांना धोकादायक इशारा मिळाल्यानंतर हे विमान नागपूरला वळवण्यात आले. कोची विमानतळावरील अधिकाऱ्यांनी या धोक्याची पुष्टी केली, ज्यामुळे आपत्कालीन प्रोटोकॉल वाढवण्यात आले आणि सुरक्षा एजन्सींशी तात्काळ समन्वय साधण्यात आला. दरम्यान, विमानाचे लँडिंग होताच सुरक्षा कर्मचाऱ्यांनी प्रवाशांना तातडीने विमानातून बाहेर काढले. तर बॉम्बशोधक पथकाने विमानाची कसून तपासणी केली. सध्या जरी अधिकाऱ्यांनी याबाबतचा अधिक तपशील उघड केलेला नसला तरी या नुकतीची गुजरातच्या विमान दुर्घटनेनंतर अशा धमकीच्या फोन ने सर्वत्र एकच खळबळ उडाली आहे.