रणजी ट्रॉफी अंतिम सामना; दानिश मालेवारचे शतक

। नागपूर । वृत्तसंस्था ।

रणजी ट्रॉफी 2024-25 चा अंतिम सामना विदर्भ वि. केरळ या संघांमध्ये खेळवला जात आहे. हा अंतिम सामना 26 फेब्रुवारीपासून नागपूरातील विदर्भ क्रिकेट असोसिएशनच्या स्टेडियममध्ये होत आहे. या सामन्याच्या पहिल्या दिवशीच विदर्भच्या संघाने सुरूवातीला झटपट तीन गडी गमावले पण संघाच्या 21 वर्षीय खेळाडूने संघाचा डाव सावरत शतकी खेळी केली.

विदर्भचा फलंदाज दानिश मालेवारने रणजी ट्रॉफी 2025 च्या अंतिम फेरीत पहिल्याच दिवशी शतक झळकावले. त्याने पहिल्या दिवशी 168 चेंडूत शतकी खेळी पूर्ण केली. केरळने अंतिम सामन्याची नाणेफेक जिंकत प्रथम गोलंदाजी करण्याचा निर्णय घेतला. उजव्या हाताच्या फलंदाज असलेल्या दानिशने सुरूवातीच्या षटकांपासून चांगली सुरूवात केली. विदर्भाला हिरव्या खेळपट्टीमुळे सुरूवातीलाच 3 धक्के मिळाले. या खेळपट्टीने पहिल्या सत्रात वेगवान गोलंदाजांना मदत केली.

फलंदाजीच्या क्रमात थोडा बदल करत अक्षय वाडकरच्या संघाने खालच्या फळीतील फलंदाज पार्थ रेखाडे आणि दर्शन नळकांडे यांना नव्या चेंडूचा सामना करण्यासाठी सलामीसाठी पाठवले. केरळच्या वेगवान गोलंदाजांनी 12 षटकांत 3 बळी घेतले. यासह यजमान संघाची धावसंख्या 3 बाद 25 धावा झाली. चौथ्या क्रमांकावर फलंदाजीला आलेला मलेवार आणि पाचव्या क्रमांकावर फलंदाजीला आलेल्या करुण नायरने महत्त्वपूर्ण भागीदारी रचली. करूण नायरबरोबरची ही भागीदारी पुढे नेत मलेवारने चालू मोसमातील दुसरे शतक झळकावले. त्याचा विदर्भासाठी हा पहिलाच हंगाम आहे. डावखुरा फिरकीपटू आदित्य सरवटेच्या चेंडूवर षटकार ठोकून 99 धावा केल्यानंतर मलेवारने मिड-विकेटवर चौकार ठोकून शतक पूर्ण केले.

दानिश मालेवारने रणजी हंगामापूर्वी नागपूर येथे आंध्रविरुद्ध प्रथम श्रेणी क्रिकेटमध्ये पदार्पण केले आणि तिसर्‍या क्रमांकावर फलंदाजी करताना दुसर्‍या डावात 61 धावा केल्या होत्या. त्यानंतर त्याने पुढील तीन डावात 56, 42 आणि 59 धावा केल्या आणि त्यानंतर नागपुरात गुजरात विरुद्ध घरच्या मैदानावर पहिले प्रथम श्रेणी शतक (115) केले. 21 वर्षीय मालेवार, ज्याने अद्याप लहान फॉरमॅटमध्ये पदार्पण केले नाही, या महिन्याच्या सुरुवातीला रणजी बाद फेरीच्या सुरुवातीपासून फॉर्ममध्ये आहे. उपांत्यपूर्व फेरीत तामिळनाडूविरुद्ध 75 आणि 0 धावा केल्यानंतर मलेवारने उपांत्य फेरीत मुंबईविरुद्ध 79 आणि 29 धावा करून मोलाचे योगदान दिले. आता अंतिम फेरीत त्याने शतक झळकावत संघाचा डाव सावरला आहे.