| मुंबई | वृत्तसंस्था |
जगातील सर्वात मोठ्या टी 20 लीगपैकी एक असणाऱ्या इंडियन प्रीमियर लीगच्या 17 व्या सिझनला 22 मार्च पासून सुरुवात झाली आहे. लोकसभा निवडणुकांच्या तारखा जाहीर होण्यापूर्वी बीसीसीआयने आयपीएल 2024 च्या 21 सामन्यांचे वेळापत्रक जाहीर केले होते. मात्र आता निवडणूक आयोगाने लोकसभा निवडणुकांच्या तारखा जाहीर केल्यावर बीसीसीआयने आयपीएल 2024 च्या संपूर्ण स्पर्धेचे वेळापत्रक 2024 जाहीर केले आहे.
बीसीसीआयने सोमवारी जाहीर केलेल्या आयपीएल 2024 च्या नव्या वेळापत्रकानुसार 17 व्या सिझनचा फायनल सामना हा 26 मे रोजी चेन्नई येथे खेळवला जाणार आहे. यंदाच्या आयपीएल मध्ये एकूण 74 सामने खेळवले जाणार असून संपूर्ण आयपीएल ही भारतातील विविध शहरात पार पडेल. यंदाही आयपीएलमध्ये मुंबई इंडियन्स, चेन्नई सुपरकिंग्स, रॉयल चॅलेंजर्स बंगळुरू, दिल्ली कॅपिटल्स, सनरायजर्स हैद्राबाद, लखनऊ सुपर जाएंट्स, गुजरात टायटन्स, पंजाब किंग्स, कोलकाता नाईट रायडर्स, राजस्थान रॉयल्स या 10 टीम सहभागी झालेल्या आहेत.
आयपीएलच्या दुसऱ्या टप्प्याला 8 एप्रिल पासून सुरुवात होणार आहे. यापूर्वी बीसीसीआयने 22 मार्च ते 7 एप्रिल दरम्यानचे वेळापत्रक जाहीर केले होते. आयपीएलच्या 17 व्या सिझनचे प्लेऑफ सामने हे अहमदाबाद आणि चेन्नई येथे खेळवले जातील. फायनल आणि क्वालिफायर 2 मॅचचे आयोजन चेन्नईतील एम.ए. चिदंबरम स्टेडियममध्ये करण्यात आले आहे. क्वालिफायर 1 आणि एलिमिनेटरचा सामना हा अहमदाबादमधील नरेंद्र मोदी स्टेडियममध्ये रंगणार आहे.