भारताबाहेर होणार आयपीएल ऑक्शन

आयपीएलचा पुढील हंगाम मार्चपासून सुरू

| नवी दिल्ली | वृत्तसंस्था |

आयपीएल 2026 चा हंगाम सुरू व्हायला अजून खूप अवकाश आहे. पण त्याआधी खेळाडूंचा लिलाव पार पडणार आहे. या लिलावाचे ठिकाण आणि तारीख आता समोर आली आहे. त्यानुसार आता तिसऱ्यांदा भारता बाहेर म्हणजे अबु धाबीत लिलाव पार पडणार असल्याची माहिती समोर आली आहे. 15 नोव्हेंबरपर्यंत खेळाडूंची ‘रिटेन्शन’ यादी जाहीर केली जाईल. यासोबतच, आयपीएलच्या लिलावाची तारीख आणि ठिकाण देखील निश्चित झाल्याचे समजते. विशेष बाब म्हणजे, यावर्षीही खेळाडूंचा लिलाव भारताबाहेर होणार असल्याचे समोर आले आहे.

भारतीय क्रिकेट नियामक मंडळ लवकरच याबाबत अधिकृत घोषणा करण्याची शक्यता आहे. आयपीएलचा पुढील हंगाम मार्चपासून सुरू होईल, असे मानले जात आहे. 15 नोव्हेंबरला जाहीर होणार ‘रिलीज’ आणि ‘रिटेन’ खेळाडूंची यादी जगातील सर्वात मोठी लीग असलेल्या इंडियन प्रीमियर लीग (आयपीएल) बद्दल सध्या अनेक बातम्या समोर येत आहेत. 15 नोव्हेंबरपर्यंत सर्व 10 संघांना आपल्या ताफ्यातील कोणते खेळाडू कायम ठेवायचे आणि कोणाला संघातून मुक्त करायचे, हे कळवावे लागणार आहे. जे खेळाडू रिलीज केले जातील, त्यांची नावे पुढील लिलावासाठी पुन्हा यादीत समाविष्ट केली जातील. यावर्षी ‘मिनी ऑक्शन’ होणार असल्याने, संघ हवे तेवढे खेळाडू रिलीज करू शकतात. संघांकडे असलेल्या मूळ रकमेत, रिलीज केलेल्या खेळाडूंची रक्कम जोडली जाईल, ज्यामुळे संघांना नवीन लिलावात खेळाडू खरेदी करता येतील. यंदाचा लिलाव 15 किंवा 16 डिसेंबर रोजी होण्याची शक्यता आहे. तथापि, तारीख अजून निश्चित व्हायची आहे. तरीही, लिलाव अबू धाबीमध्येच होणार हे जवळजवळ निश्चित मानले जात आहे.

सध्या ‘रिटेन्शन लिस्ट’ची प्रतीक्षा लिलावाला अजून अवकाश आहे, पण सध्या सर्वांचे लक्ष रिटेन्शन यादीवर लागले आहे. संघांनी आपापल्या याद्या तयार केल्या आहेत, पण त्या अद्याप उघड झालेल्या नाहीत. रिटेन्शनमध्ये जितके मोठे खेळाडू रिलीज केले जातील, तितकाच लिलावात अधिक रोमांच निर्माण होईल. त्यामुळेच, 15 नोव्हेंबरच्या संध्याकाळकडे सर्वांचे लक्ष लागून राहिले आहे, जेव्हा रिटेन्शन यादी जाहीर केली जाईल. मागील वर्षी ‘मेगा ऑक्शन’ झाला होता, त्यामुळे आता ‘मिनी ऑक्शन’ची तयारी सुरू आहे.

लिलाव कधी होईल?
आयपीएल 2026 चा लिलाव 15 किंवा 16 डिसेंबर रोजी होण्याची शक्यता आहे. गेल्या वर्षी सौदी अरेबियामध्ये झालेल्या मेगा लिलावानंतर हा एक छोटासा लिलाव आहे.

रिटेन्शनची तारीख
10 संघांना खेळाडू कायम ठेवण्याची अंतिम तारीख 15 नोव्हेंबर आहे. चेन्नई सुपर किंग्ज आणि राजस्थान रॉयल्स यांच्यातील ट्रेंड अंतिम टप्प्यात आहेत आणि लवकरच घोषणा होण्याची अपेक्षा आहे. संजू सॅमसन चेन्नई सुपर किंग्जमध्ये सामील होणार आहे, तर राजस्थान रॉयल्स पुढील हंगामासाठी रवींद्र जडेजाला कायम ठेवेल.