जिया ठरली सर्वोच्च पदक विजेती

| मुंबई | प्रतिनिधी |

डेहराडून येथे पार पडलेल्या आशियाई खुल्या शॉर्ट ट्रक स्पीड स्केटिंग चषक स्पर्धेत गती, सहनशक्ती आणि रणनीतीचा थरार अनुभवायला मिळाला. महाराष्ट्राच्या 11 वर्षीय जिया शेट्टीने अफलातून स्केटिंग करताना दोन सुवर्णपदकांसह एक रौप्य आणि एक कांस्य जिंकत चौकार ठोकला आहे. या स्पर्धेत जपान, थायलंड, चीन, तैपेई, व्हिएतनाम, सिंगापूर आणि फिलिपिन्ससह नऊ देशांतील खेळाडूंनी या ऑलिम्पिक हिवाळी क्रीडा स्पर्धेत भाग घेतला होता. यावेळी जियाने 333 मीटर व 500 मीटर स्पर्धेतील शर्यतीत सुवर्णपदकांना गवसणी घातली. तर, 777 मीटर शर्यतीत तिने रौप्य कामगिरीही केली. तसेच, मिश्र रिलेमध्ये तिने कांस्यपदकही जिंकले. या पदकांच्या चौकारासह जिया भारतासाठी सर्वोच्च पदक विजेती खेळाडू ठरली. तिच्या या यशाने ती आशियातील सर्वाधिक प्रगतिकारक युवा खेळाडू ठरली आहे. जियासह कमलाकर स्वर यानेही दोन सुवर्ण, वर्धन लड्डाने दौन रौप्य तर अन्वयी देशपांडेने एक कांस्यपदक मिळवले आहे.