कोळगाव येथील भराव प्रकरणी जेएसडब्ल्यू अडचणीत?

पर्यावरण विभागाकडून प्रलंबित तक्रारीची दखल

। अलिबाग । प्रतिनिधी ।

अलिबाग तालुक्यातील कोळगांव येथे सीआरझेडचे उल्लंघन करीत अवैध बांधकाम करण्यात आले आहे. जेएसडब्ल्यू फ्लाय अ‍ॅशच्या अनधिकृत भरावामुळे पर्यावरणाचा र्‍हास होण्याची भिती व्यक्त करण्यात आली आहे. याबाबत बॉम्बे एनव्हारमेंट अ‍ॅक्शन ग्रुप मुंबईचे प्रतिनिधी अनिल पंडित, वासुदेव भंगरे यांनी पर्यावरण विभागाकडे तक्रार अर्ज केला होता. या अर्जाची दखल घेण्यात आली आहे. रायगडच्या जिल्हाधिकार्‍यांकडून अहवाल मागविण्यात आला आहे. त्यामुळे जेएसडब्ल्यू कंपनी अडचणीत येण्याची शक्यता वर्तविली जात आहे.

जेएसडब्ल्यू फ्लाय अ‍ॅशच्या भरावाच्या तक्रारी अलिबाग तालुक्यात वाढत आहेत. तलाठी, मंडळ अधिकारी व ग्रामस्थ यांनी संयुक्तरित्या केलेल्या पंचनाम्यामध्ये वारंवार ही बाब निदर्शनास येत आहे. कोळगांव येथील 323 व इतर विविध गटात सीआरझेड नियमांचे उल्लंघन करणार्‍या अवैध बांधकामाविरोधात तसेच जेएसडब्ल्यू फ्लाय अ‍ॅशच्या अनधिकृत भरावाबाबत अनिल पंडित, वासुदेव भंगरे तर्फे विलास बुरांडे यांनी 25 फेब्रुवारी 2015 रोजी कोळगावं येथील 320, 321 मधील अनधिकृत बांधकामाबाबत पर्यावरण विभागाकडे अर्ज केला होता.

जेएसडब्ल्यू फ्लाय अ‍ॅशच्या अनधिकृत भरावांबाबत कंपनीवर तात्काळ कारवाई करावी अशी मागणी करण्यात आली होती. कोळगांव येथील गट क्र.323 या मिळकतीमध्ये जमीन मालक यांनी केलेल्या अनधिकृत भरावाच्या अनुषंगाने स्थळ पाहणी केली असता या मिळकतीमध्ये सुमारे 70 मी. लांब 30मी. रूंद 03मी. उंच असा जेएसडब्ल्यू कंपनीचा टाकाऊ (स्लॅग) चा भराव केलेला दिसून येत आहे. त्यावर मुरुम मातीचा थर पसरण्यात येत असल्याचे मंडळ अधिकारी सारळ व तलाठी धोकवडे यांच्या 7 मार्च रोजी झालेल्या पंचनाम्यातून स्पष्ट दिसून येत आहे. ही मिळकत समुद्रालगत असल्याने सीआरझेड क्षेत्रामध्ये असल्याचे स्पष्ट दिसून येत आहे. ही मिळकत व त्या लगत असलेल्या गट क्र. 317 या मिळकती च्या सभोवताली सिमेंट काँक्रेटच्या संरक्षक भिंतीचे बांधकाम करण्यात आले आहे.
भराव व बांधकामबाबत जमीन मालक यांनी सक्षम प्राधिकरणाची परवानगी घेतली नसल्याचा उल्लेख पंचनाम्यात स्पष्ट दिसून येत आहे. बांधकाम व भरावामुळे पर्यावरणाचा समतोल बिघडण्याचा धोका आहे. या परिसरात पुर परिस्थिती निर्माण होण्याची भिती आहे. ही बाब तक्रारदार यांनी पर्यावरण विभागाच्या निदर्शनास आणून दिली. तक्रारीची दखल घेत पर्यावरण विभागाने जिल्हा प्रशासनाकडे अहवाल मागितला आहे.

पर्यावरण विभागासोबतच जिल्हाधिकारी यांच्या कार्यालयाने तक्रारदार यांच्या तक्रारीबाबत उप विभागीय अधिकारी यांना पत्र दिले आहे. अर्जाचे अवलोकन करुन प्रत्यक्ष जागेवर जाऊन स्थळ पाहणी व सखोल चौकशी करुन प्रस्तुत क्षेत्र सीआरझेड अधिसुचना 1991,2011 तसेच सुधारीत अधिसूचना 2019 च्या तरतुदींचे उल्लंघन केल्याचे आढळून आल्यास कार्यवाही करणेबाबत उक्त अधिसूचने अन्वये कळविण्यात आले आहे. तसेच पर्यावरण (संरक्षण) अधिनियम, 1986चे कलम 19 अ नुसार गुन्हयाची दखल घेण्याचे अधिकार संबंधित उपविभागीय अधिकारी यांना प्रदान केले आहेत. तातडीने कार्यवाही करुन अर्जदार यांना आपले स्तरावरुन उचित उत्तर देण्यात यावे. तसेच केलेल्या कार्यवाहीबाबत माहिती देण्यात यावी, असे आदेश जिल्हाधिकारी यांनी दिले आहेत. तक्रारीनंतर कोळगांव येथील भराव व बांधकाम प्रकरण संबंधितांना महागात पडणार आहे. जेएसडब्लू कंपनीतील टाकावूच्या भरावामुळे कंपनी अडचणीत सापडण्याची शक्यता आहे.