अजिंक्यपद स्पर्धेला दमदार सुरुवात; स्पर्धेच्या पहिल्याच दिवशी रंगला थरार
| मुंबई | प्रतिनिधी |
मुंबई खो-खो संघटनेच्या मान्यतेने आणि महाराष्ट्र ॲमॅच्युअर स्पोर्ट्स असोसिएशन तर्फे किशोर-किशोरी मुंबई जिल्हा अजिंक्यपद खो-खो स्पर्धेवे आयोजन करण्यात आले आहे. या स्पर्धा मुंबईतील ओम समर्थ भारत व्यायाम मंदिरच्या मैदानावर पार पडत आहेत. या स्पर्धेत दोन्ही गटांत 10-10 संघ उतरले असुन, या स्पर्धेने पहिल्याच दिवशी थरार, वेग आणि उत्कंठेची पराकाष्ठा गाठली.
या स्पर्धेचे उद्घाटन ओम समर्थ भारत व्यायाम मंदिराचे अध्यक्ष उन्मेश नरवणे, सचिव दलीप साठे, विश्वस्त संजय पारेख, खजिनदार भावेश पारिख, महाराष्ट्र अम्युचर स्पोर्ट्स असोसिएशनचे सचिव प्रकाश नकाशे व प्रशिक्षक नितीन पाष्टे यांच्या हस्ते पार पडले. यावेळी मुंबई खो-खो संघटनेचे प्र.कार्यवाह सुरेंद्र विश्वकर्मा, खजिनदार डलेश देसाई व विकास पाटील यांच्यासह पदाधिकारी, खो-खो प्रेमी व प्रेक्षक मोठ्या संख्येने उपस्थित होते.
किशोरी गटातील सामन्यात नाणेफेक ओम समर्थ व्यायाम मंदिरने जिंकून संरक्षण स्वीकारले, आणि त्याचा पुरेपूर फायदा घेत त्यांनी अमर हिंद मंडळाचा 18-7 (मध्यंतर 18-1) असा एक डाव राखून 11 गुणांनी धुव्वा उडवला. ओम समर्थकडून श्रेया तामणकर, मैत्री नलावडे, स्वरा वांगडे, अनन्य राजे यांनी सलग कामगिरी करत सामन्यावर वर्चस्व गाजवले. अमर हिंदकडून वृषाली मोरे, ईश्वरी शिंदे यांनी प्रयत्न केले, मात्र ते अपुरे ठरले. किशोर गटाच्या लढतीत नाणेफेक ओम साईश्वर सेवा मंडळने जिंकून आक्रमण निवडले. त्यांनी 11-6 असा एक डाव राखून 5 गुणांनी विजय मिळवला. विजयी संघाकडून श्रातिक गामी, आरव साटम, अधिराज गुरव, चिन्मय तांबे यांनी दमदार खेळ केला. पराभूत संघाकडून सार्थ वायंगणकर, कृषल वाघधरे यांनी झुंजार लढत दिली. दुसऱ्या सामन्यात नाणेफेक वैभव स्पोर्ट्स क्लबने जिंकून संरक्षण निवडले, परंतु ओम समर्थ भारत व्यायाम मंदिरने 4-3 (मध्यंतर 1-2) असा एक गुणाने थरारक विजय मिळवला. निहाल शिंदे, रुद्र सिंग चव्हाण, ईशान देसाई यांनी निर्णायक भूमिका बजावली. वैभवकडून शुभम माळी, यश जाधव, अनिकेत गुप्ता यांनी जोरदार लढत दिली. तिसऱ्या सामन्यात नाणेफेक विद्यार्थी क्रीडा केंद्रने जिंकून संरक्षण स्वीकारले. त्यांनी 6-4 असा साडेपाच मिनिटे राखून 2 गुणांनी विजय मिळवला. विघ्नेश जाधव, कार्तिक तोरस्कर, आर्यन परवाडी, अंशुमन भिडे यांनी संघाला विजय मिळवून दिला. अमर हिंदकडून वेदांत हडशी, जीवन उपाध्याय यांनी चांगली झुंज दिली. चौथ्या सामन्यात नाणेफेक सरस्वती स्पोर्ट्स क्लबने जिंकून आक्रमण निवडले. त्यांनी 16-10 असा 6 गुणांनी विजय मिळवला. विजयी संघाकडून यतीन, शिवम झा, अनिकेत सोनार, भाविक घाग यांनी प्रभावी खेळ केला, तर सरस्वती मंदिर हायस्कूलकडून अलीम, ऋषभ नाडकर यांनी चांगला प्रतिसाद दिला. या स्पर्धेच्या पहिल्याच दिवशी खेळाडूंच्या चपळतेने, जिद्दीने आणि थरारक खेळीने प्रेक्षकांची मने जिंकली.