सीओईपी कॉलेज होस्टेलमध्ये धक्कादायक प्रकार

| पुणे | वृत्तसंस्था |

पुण्यातील सीओईपीच्या वसतिगृहातील एका विद्यार्थिनीने आपल्या रूमपार्टनरचे कपडे बदलतानाचे व्हिडिओ बनवून बॉयफ्रेंडला पाठवल्याचा प्रकार समोर आला आहे. संतप्त विद्यार्थ्यांनी कॉलेज व्यवस्थापनाकडे तक्रार केली. या तक्रारीनंतरही व्यवस्थापनाने कोणतीही कारवाई न केल्याने या विद्यार्थ्यांना मदतीसाठी सोशल मीडियाचा आधार घ्यावा लागला.

मिळालेल्या माहितीनुसार, आर्या आणि विनीत हे दोघे ही एकमेकांच्या ओळखीचे आहेत. आर्या हिने हॉस्टेलमधील विद्यार्थिनींचे चोरून व्हिडिओ फोटो काढून तिचा मित्र विनीत सुराणा याला पाठवले. या प्रकरणी आर्या आणि विनीत सुराणा या दोघांवर गुन्हा दाखल करण्यात आला आहे. नेमके हे कृत्य त्यांनी का केले याचा तपास पोलीस करत आहेत. आरोपी मुलीला वाचवण्याचा प्रयत्न करणारी कॉलेज व्यवस्थापनाची व्यक्ती कोण आहे, याची चौकशी करून त्याच्यावरही पोलिसांत गुन्हा दाखल करण्याची मागणी होत आहे. मात्र, आम्ही चौकशी सुरू केल्याचे व्यवस्थापनाकडून स्पष्ट केले जात आहे.

त्यांना कॉलेजमधून तात्पुरते निलंबित करण्यात आले आहे. विद्यार्थ्यांची तक्रार येताच आम्ही चौकशी आणि इतर कारवाई करण्यास सुरुवात केली. आरोपी विद्यार्थिनी हा व्हिडिओ तिच्या बॉयफ्रेंडला का देत होती, याची चौकशी केली जात आहे. पोलिसांनीही ही बाब गांभीर्याने घेतली असून तिच्या बॉयफ्रेंडने हे व्हिडिओ आणि फोटो इतरत्र पाठवले आहेत का, याचाही तपास पोलीस करत आहेत. त्यासाठी आयटी तज्ज्ञांची मदत घेतली जात आहे.