| पनवेल । वार्ताहर ।
तरुणाईच्या आवडी निवडीमध्ये झालेले बदल, महागाई आणि पक्ष्यांच्या सुरक्षेसाठी पतंग उडवण्यावरून सुरु असलेली जनजागृती केली जात आहे. त्याचा परिणाम पतंग विक्रीवर झाला आहे. कारण कधीकाळी संक्रांतीच्या आठवडाभर आधीपासून पतंग खरेदीसाठी दुकानांमध्ये होणारी गर्दी कमी झाल्याने विक्रीही तब्बल 50 टक्क्यांनी घटल्याने विक्रेते चिंतेत पडले आहेत.
संगणक, मोबाईलच्या महाजालात आजची तरुणाई अडकलेली आहे. त्यामुळे मोबाइलवर खेळण्यात गुंग झालेल्या तरुणांना मैदानी खेळांचा विसर पडला आहे. इतकेच नव्हे तर पतंग उडवण्यातही तरुणांना रस राहिलेला नाही. गेल्या पाच वर्षांमध्ये पतंग-मांजा विक्रीच्या व्यवसायावरच मंदी आली आहे. त्यामुळे ऑक्टोबर महिना उजाडल्यांनंतर आकाशात भिरभरणारे पतंग मकारसंक्रांत अवघ्या आठवड्यावर आली तरी आकाशात दिसत नसल्याने विक्रेत्यांमध्ये चिंतेचे वातावरण आहे.
कारागीर मिळत नसल्याने अडचण
पतंग निर्मितीच्या कामामध्ये कौशल्याची आवश्यकता आहे. एकेकाळी पतंग बनवणारे कसबी कारगीर होते. पंरतु, काळाच्या ओघात या कारागिरांची संख्या घटली आहे. मनुष्यबळाचा अभाव निर्माण झाल्याने पतंग बनवणार्या कारागिराला दिवसभरासाठी 300 ते 400 रुपये दिले जातात. मात्र अन्य ठिकाणी काम केल्यावर 500 ते 600 रुपये रोजंदारी मिळत असल्याने पतंग निर्मितीचे काम करायला कोणी तयार होत नाही. परिणामी, कारागिरांची अभाव ही देखील या व्यवसायाला भेडसावू लागली आहे.
नायलॉन मांजाला नवा पर्याय
पतंग विक्रीसमोरील विविध अडचणी लक्षात घेता विक्रेत्यांनी बाजारात वेगवेगळ्या आकाराचे फॅन्सी पतंग, लहान मुलांना आकर्षित करण्यासाठी डोरेमॉन, छोटा भीम, मोटू-पतलू, लिटील सिंगम, बटरफ्लाय तर नायलॉन मांजाला पर्याय म्हणून बारा तार मांजा बाजारात आणला आहे. पण या प्रयत्नांना पतंगप्रेमींचा प्रतिसादच मिळत नसल्याने विक्रेते अडचणीत आले आहेत.
डेकोरेशनसाठी वापर
पतंगाचा वापर डेकोरेशनसाठी मकरसंक्रात आल्यामुळे ऑफिस तसेच घरामध्ये डेकोरेशन करण्यासाठी पतंगाचा वापर केला जात आहे. डेकोरेशनसाठी असणार्या छोट्या पतंगाला जास्त मागणी आहे.