कोंढे तर्फे श्रीवर्धन अंगणवाडीत प्रवेशोत्सवाचा जल्लोष

चिमुकली मायरा कदमचे औक्षण करुन स्वागत

| श्रीवर्धन | प्रतिनिधी |

बालकांच्या शैक्षणिक प्रवासातील पहिलं पाऊल आनंददायी आणि संस्मरणीय ठरावं, या उद्देशाने एकात्मिक बाल विकास सेवा योजनेअंतर्गत बागमांडले बिटमधील कोंढे तर्फे श्रीवर्धन येथील अंगणवाडी केंद्रात ‌‘प्रथम प्रवेश दिन’ मोठ्या उत्साहात आणि आनंदी वातावरणात साजरा करण्यात आला. या कार्यक्रमाने संपूर्ण परिसरात उत्साहाची लहर निर्माण झाली.

यावेळी अंगणवाडीत नव्याने दाखल झालेल्या चिमुकली मायरा निखिल कदम हिचे पारंपरिक पद्धतीने औक्षण करून जंगी स्वागत करण्यात आले. फुलांच्या हारांनी, रंगीबेरंगी फुग्यांनी आणि आकर्षक सजावटीने सजलेल्या अंगणवाडी केंद्रामुळे संपूर्ण परिसर एखाद्या सणासारखा उजळून निघाला होता. प्रत्येक कोपऱ्यात आनंद, उत्साह आणि आपुलकीची झळाळी दिसून येत होती.

अंगणवाडी सेविका रजनी राजेश कासरुंग यांनी मायऱ्याचे औक्षण करून तिच्या कपाळावर टिळा लावला आणि तिला प्रेमाने स्वागत करत शैक्षणिक जीवनाची गोड सुरुवात करून दिली. यावेळी मायऱ्याला शैक्षणिक खेळणी, चित्रमय पुस्तके आणि विविध भेटवस्तू देऊन तिच्या शिक्षणप्रवासासाठी शुभेच्छा देण्यात आल्या. लहानग्यांच्या चेहऱ्यावर उमटलेला आनंद आणि पालकांच्या डोळ्यांतील समाधान या सोहळ्याचे वैशिष्ट्य ठरले. कार्यक्रमात मायऱ्याच्या पहिल्या पावलांचे ठसे घेण्याचा अनोखा आणि भावनिक उपक्रम राबवण्यात आला. या माध्यमातून बालकाच्या जीवनातील हा महत्त्वाचा क्षण कायमस्वरूपी जतन करण्याचा प्रयत्न करण्यात आला. हा उपक्रम उपस्थितांसाठी विशेष आकर्षण ठरला.

बाल उद्यान केंद्रात मान्यवरांच्या उपस्थितीत पार पडलेल्या या सोहळ्यात पालकांचीही मोठ्या प्रमाणावर उपस्थिती होती. यावेळी सेविका रजनी राजेश कासरुंग यांनी पालकांशी संवाद साधत अंगणवाडीतील प्राथमिक शिक्षणाचे महत्त्व, बालकांच्या बौद्धिक, शारीरिक व सामाजिक विकासातील भूमिका तसेच संतुलित आणि पौष्टिक आहाराचे महत्त्व याबाबत सविस्तर मार्गदर्शन केले. उपस्थित पालकांनी सांगितले की, अशा उपक्रमांमुळे लहान मुलांमधील शाळेविषयीची भीती कमी होते, आत्मविश्वास वाढतो आणि शिक्षणाबद्दल आपुलकी निर्माण होते. बालकांच्या आयुष्यातील पहिल्या शैक्षणिक टप्प्याला आनंददायी बनवण्यासाठी अशा कार्यक्रमांची आवश्यकता असल्याचे मतही त्यांनी व्यक्त केले. या कार्यक्रमास मायऱ्याचे कुटुंबीय, ग्रामस्थ तसेच अंगणवाडीतील इतर बालके मोठ्या संख्येने उपस्थित होते. सर्वांनी एकत्र येऊन या आनंदोत्सवात सहभाग घेतला आणि कार्यक्रम अधिक रंगतदार केला. कार्यक्रम यशस्वी करण्यासाठी अंगणवाडी सेविका व मदतनीस यांनी परिश्रमपूर्वक नियोजन करून प्रत्येक घटकात बारकाईने लक्ष दिले. त्यांच्या मेहनतीमुळे हा ‌‘प्रथम प्रवेश दिन’ केवळ एक कार्यक्रम न राहता, तर एक अविस्मरणीय उत्सव ठरला.