केरळच्या वायनाडमध्ये भूस्खलन; शेकडो लोक ढिगाऱ्याखाली

| केरळ | वृत्तसंस्था |

केरळच्या वायनाडमधील काही गावात मुसळधार पावसामुळे भूस्खलनाची घटना घडली आहे. या भूस्खलनात शेकडो लोक ढिगाऱ्याखाली दबले गेले आहेत. या दुर्घटनेत आतापर्यंत 54 जणांचा मृत्यू झाला आहे. या मृतांमध्ये लहान मुलांचाही समावेश आहे.

लोकांना वाचवण्यासाठी रेस्क्यू ऑपरेशन सुरु करण्यात आले आहे. एनडीआरएफ आणि एअरफोर्सचे पथक घटनास्थळी मदतकार्याला पोहोचली आहे. वायनाड जिल्ह्याच्या मुंडक्काई, चुरमाला, अट्टामाला आणि नूलपुझा या गावात ही दुर्घटना घडली आहे. केरळच्या आरोग्य मंत्री वीना जॉर्ज यांनी म्हटलं की, आरोग्य विभागाने जिल्हा स्तरावर नियंत्रण कक्षाची स्थापना केली आहे. यात आपात्कालीन स्थितीत आरोग्य सुविधांचा लाभ घेता येईल. तसेच दोन हेल्पलाईन क्रमांकही जारी करण्यात आले आहेत. 8086010833 आणि 9656938689 हे दोन्ही हेल्पलाईन क्रमांक जारी केले आहेत. जिल्ह्यातील वैथिरी, कलपट्टा, मेप्पडी आणि मननथावाडी रुग्णालयात जखमींवर उपचार सुरु आहेत. वायनाडमधील चार गावांत झालेल्या भूस्खलनाच्या घटनेनंतर अग्निशमन दल आणि एनडीआरएफचे पथक घटनास्थळी तैनात करण्यात आले आहे. 100 हून अधिक लोक ढिगाऱ्याखाली दबल्याची माहिती मिळत आहे. मुसळधार पावसामुळे मदतकार्यात अडथळे येत असल्याची माहिती अधिकाऱ्यांनी दिली आहे. तसेच या दुर्घटनेत नागरिकांचं प्रचंड नुकसान झाले आहे.

16 जण रुग्णालयात दाखल
भूस्खलनात जखमी झालेल्या 16 जणांना वायनाडमधील मेपाडी येथील खासगी रुग्णालयात दाखल करण्यात आले आहे. केरळचे मुख्यमंत्री पिनराई विजयनही या प्रकरणावर लक्ष ठेवून आहेत. त्यांनी सांगितले की, वायनाडमध्ये भूस्खलनानंतर सर्व संभाव्य बचाव कार्यात समन्वय साधला जाईल, घटनेची माहिती मिळताच सरकारी यंत्रणेने बचावकार्य सुरू केले आहे. राज्यातील सर्व सरकारी यंत्रणा बचाव कार्यात गुंतल्या आहेत.