मोबाइलसाठी लोको पायलटला मारहाण

पनवेल रेल्वे स्थानकातील घटना

| पनवेल । वार्ताहर ।

स्थानक परिसरात मोबाइलवर बोलत उभ्या असलेल्या लोको पायलटवर गर्दुल्ल्यांकडून मोबाइलचोरीसाठी जीवघेणा हल्ला केल्याची घटना रविवारी रात्री घडली. पनवेल रेल्वे स्थानकाशेजारील नवनाथनगर झोपडपट्टीत राहणार्‍या हल्लेखोरास मोबाइल हिसकावून पळून नेताना हटकल्यामुळे त्याने हा हल्ला केला.

अजनीकुमार रमाशंकर बिंद (30) हे छत्रपती शिवाजी महाराज टर्मिनसमध्ये लोको पायलट मॅनेजर म्हणून काम करतात. रविवारी रात्री पनवेल रेल्वे स्थानकात ते ड्युटीवर होते. रात्री जेवण झाल्यानंतर साडेदहाच्या सुमारास प्लॅटफॉर्म क्रमांक 1 येथे पोलिस चौकीबाहेर फोनवर बोलत उभे होते. नशेत असलेल्या चोरट्याने लोको पायलट बिंद यांच्यावर हल्ला करण्याचा प्रयत्न केला. तोंडावर, नाकावर जोरदार ठोसे मारले. बिंद यांनी आरडाओरड केल्यामुळे ड्युटीवर असलेले लोहमार्ग पोलिस, आरपीएफ पोलिस धावून गेले. इजाज सलिम शेख (23) असे हल्लेखोराचे नाव आहे, स्थानकाजवळील नवनाथनगर झोपडपट्टीत तो राहतो. पोलिसांनी त्याला ताब्यात घेतले असून मोबाइलचोरी करून चोरीसाठी जबरी मारहाण केल्याप्रकरणी पनवेल लोहमार्ग पोलिस ठाण्यात गुन्हा दाखल केला आहे.
बिंद यांना जबर मारहाण झाल्यामुळे प्राथमिक उपचारानंतर त्यांना खांदा कॉलनीतील अष्टविनायक हॉस्पिटलमध्ये उपचारासाठी दाखल करण्यात आले आहे. झटापटीत झुडपांमध्ये फेकून दिलेला 15 हजार रुपये किंमतीचा मोबाइल सापडला आहे.