विळे येथे महाराजस्व समाधान

| माणगाव | प्रतिनिधी |

छत्रपती शिवाजी महाराज महाराजस्व समाधान शिबीर (दि.10) एप्रिल रोजी राजिप मराठी शाळा विळे येथे उत्साहात पार पडले. या शिबिरात विविध शासकीय विभागांच्या माध्यमातून नागरिकांना थेट सेवा व मार्गदर्शन देण्यात आले.

या कार्यक्रमाला विलास शिंदे, तहसीलदार माणगाव विपीन लोकरे, महसूल नायब तहसीलदार घेमुड, तालुका आरोग्य अधिकारी डॉ. पुरी, उपभूमी अभिलेख अधिकारी सोनार यांची प्रमुख उपस्थिती होती. तसेच एकात्मिक बाल विकास सेवा योजनेअंतर्गत कर्मचारीवर्ग, सर्व अंगणवाडी सेविका, सरपंच, उपसरपंच व ग्रामपंचायत सदस्य मोठ्या संख्येने उपस्थित होते.

शिबिरात लक्ष्मी चॅरिटेबल ट्रस्टचे डॉक्टर व कर्मचारी तसेच प्राथमिक आरोग्य केंद्र शिरवली येथील डॉ. पटेल सर व आरोग्य कर्मचाऱ्यांनी सक्रिय सहभाग घेतला. यावेळी बाल आरोग्याबाबत मार्गदर्शन करण्यात आले. मातांना व विद्यार्थ्यांना विविध दाखल्यांचे वाटप करण्यात आले. उपस्थित नागरिकांना स्वतःच्या व बालकांच्या आरोग्याची काळजी घेण्याबाबत सूचना देण्यात आल्या. विशेषतः समतोल आहार, नियमित व्यायाम आणि पुरेशी विश्रांती यांचे महत्त्व पटवून देण्यात आले. तसेच शिबिरात आलेल्या लाभार्थ्यांना आवश्यक त्या आरोग्य सेवा पुरविण्यात आल्या. कार्यक्रमाचे सूत्रसंचालन हेमंत बारटक्के यांनी केले, तर आरोग्य सेवक सुधीर गणपत खैरे आदींनी सहकार्य केले.