महावितरणाच्या क्रिकेट सामन्यात मुख्यालय संघाचा विजय

| अमरावती | प्रतिनिधी |

श्री हनुमान व्यायाम प्रसारक मंडळाच्या क्रीडासंकुलात सुरु असलेल्या महावितरणच्या राज्यस्तरीय क्रीडा स्पर्धेमध्ये वरिष्ठ अधिकाऱ्यांच्या प्रदर्शनी क्रिकेट सामन्यात बुधवारी (दि.12) मुंबई मुख्यालय संघाने 12 षटकांमध्ये 96 धावांचे आव्हान देत नागपूर प्रादेशिक संघाला 90 धावांवर रोखले व शेवटच्या षटकापर्यंत रंगतदार झालेल्या या सामन्यात सहा धावांनी विजय मिळवला.

महावितरणचे राजेंद्र पवार यांच्या प्रमुख उपस्थितीत हा सामना सुरू झाला. मुंबई मुख्यालयाने नाणेफेक जिंकत प्रथम फलंदाजी स्वीकारली व खराब चेंडूवर फटकेबाजी सुरू केली आणि 12 षटकांमध्ये 6 बाद 96 धावा केल्या. यात प्रसाद रेशमे (13 धावा), वैभव थोरात (18 धावा) व प्रमोद खुळे (17 धावा) यांनी धावसंख्येला आकार दिला. तर भुजंग खंदारे, संजय ढोके यांनीही साथ दिली. मात्र, नागपूर प्रादेशिक संघाने 18 धावा अतिरिक्त दिल्याने मुख्यालय संघाची सामन्यावरील पकड मजबूत झाली.

नागपूर प्रादेशिक संघाने आव्हान स्विकारून सावध पवित्रा घेत फलंदाजी सुरू केली. यात संजय वाकडे (18 धावा) तर प्रफुल लांडे (15 धावा) यांनी चांगली भागिदारी करीत लक्ष्याकडे वाटचाल सुरू केली. त्यानंतर पुरूषोत्तम चव्हाण व मधुसूदन मराठे यांनी प्रत्येकी 11 धावा केल्या. अमरावतीचे अशोक साळुंके यांनी 7 धावांचे योगदान देत संघाला विजयाकडे नेले. त्यांना चंद्रपूरचे हरिष गजबे व प्रविण दरोली यांनी साथ दिली. मात्र, शेवटच्या षटकामध्ये विजयासाठी 11 धावांची गरज होती. मुख्यालय संघाकडून प्रमोद खुळे यांनी अचूक गोलंदाजी केली व इतरांनी उत्कृष्ट क्षेत्ररक्षण केले. त्यामुळे नागपूर प्रादेशिक संघ शेवटच्या षटकात केवळ पाच धावा करू शकला आणि मुख्यालय संघाने सहा धावांनी विजय मिळवला. याप्रसंगी राजेंद्र पांडे, सुनील पावरा व माणिक गवळी, बजरंग सुर्यवंशी, सुमेध कोलते सुहास रंगारी, दिलीप दोडके, राजेश नाईक रूपेश देशमुख आदी उपस्थित होते.