श्रीलंकेच्या खेळाडूवर मोठी कारवाई
। नवी दिल्ली । वृत्तसंस्था ।
भारत अ आणि श्रीलंका अ यांच्यातील सामन्यादरम्यान, वैभव सूर्यवंशी आणि विशन हालंबागे यांच्यात जोरदार वाद आणि झटापट झाली. या प्रकरणाची गंभीर दखल घेत, सामनाधिकारी प्रदीप जयप्रकाश यांनी श्रीलंकन खेळाडू विशन याला दंड ठोठावला आहे. मात्र, भारतीय खेळाडू वैभव सूर्यवंशी याच्यावर कोणतीही कारवाई किंवा बंदी घालण्यात आली आहे की नाही, याबाबतची माहिती अद्याप समोर आलेली नाही. श्रीलंकेचा अष्टपैलू खेळाडू विशेन हलांबागे याला सामना पंचांनी दंड ठोठावला आहे. तिरंगी मालिकेतील सामन्यादरम्यान 21 वर्षीय हलांबागे आणि वैभव सूर्यवंशी यांच्यात वाद झाला; यावेळी त्यांच्यात धक्काबुक्कीही झाली.
मिळालेल्या माहितीनुसार, सामना सुरू होण्यापूर्वीच हलांबागे सूर्यवंशीवर टीका करत होता आणि त्याने या 15 वर्षीय खेळाडूवर वैयक्तिक स्वरूपाची टिप्पणीही केली होती. सामना संपल्यानंतरही त्याने सूर्यवंशीला काहीतरी म्हटल्यामुळे परिस्थिती अधिकच चिघळली. हा खेळाडू वैभव सूर्यवंशीच्या अगदी जवळ गेला आणि त्यानंतर सूर्यवंशीने त्याला धक्का दिला. या संपूर्ण घटनेत तो श्रीलंकन खेळाडू दोषी आढळला आहे. भारत अ विरुद्ध खेळणाऱ्या श्रीलंकेचा अनुभवी यष्टिरक्षक निरोशन डिकवेला याच्यावरही सामना पंचांनी दंड ठोठावला आहे. डिकवेला एका वेगळ्या घटनेत दोषी आढळला; वैभव सूर्यवंशी याच्याशी झालेल्या वादासाठी त्याला जबाबदार धरण्यात आलं नाही. विशेष म्हणजे, विशन हलांबागे आणि वैभव सूर्यवंशी यांच्यातील तणाव निवळण्यासाठी डिकवेलानेच मध्यस्थी केली होती. वैभव सूर्यवंशीवर काही कारवाई करण्यात आली आहे की नाही, हे अद्याप स्पष्ट झालेलं नाही. सूर्यवंशीने श्रीलंकेच्या एका खेळाडूला धक्काही दिला होता आणि या 15 वर्षीय खेळाडूवर कारवाई होऊ शकते अशी चर्चा होती; मात्र, तसं काही घडलेलं नाही. सूर्यवंशीशी संबंधित वादाच्या या प्रकरणावर बीसीसीआयनेही आपली प्रतिक्रिया दिली आहे. बीसीसीआयचे सचिव देवजित सैकिया यांनी भारतीय खेळाडूंना अनावश्यक गोष्टींवर लक्ष न देता मालिकेवर लक्ष केंद्रित करण्याचा सल्ला दिला आहे.