कर्जत पोलीस ठाण्याची प्रशंसनीय कामगिरी
| नेरळ | प्रतिनिधी |
कर्जत तालुक्यातील टेम्बरे आंबिवली येथील एका एनजीओ संस्थेच्या इमारती मधून परदेशी पक्षांची चोरी करण्याची घटना घडली होती. या घटनेची कर्जत पोलीस ठाण्यात नोंद झाल्यानंतर पोलिसांच्या गुन्हे प्रकटीकरण पथकाने तामिळनाडू राज्यात जाऊन पक्षी चोरणाऱ्यांच्या मुसक्या आवळल्या आहेत. या परदेशी पक्षांची किंमत सव्वा अकरा लाख एवढी असून, पोलिसांच्या या कामगिरीचे कौतुक होत आहे.
टेंभरे-आंबीवली रिवाईल्ड सैच्यूरी ॲण्ड चॅरिटेबल ट्रस्टमधील आफ्रिकन ग्रे पॅरोट, 01 ब्ल्यू गोल्ड मकाव, 01 स्कार्लेट मकाव या प्रजातींचे जिवंत पक्षी यांची चोरी करण्याची घटना घडली होती. तेथे लोखंडी पिंजऱ्याच्या दरवाजाची कडी तोडून चोरी करुन नेले होते. आफ्रिकन ग्रे पॅरोट याची बुध्दीमत्ता ही पाच वर्षांच्या मुलाइतकी असते आणि ते लोकांशी संवाद साधतात, त्यामुळे त्यांना पाळीव प्राण्यांसारखे सांभाळतात आणि ते साधारण 40 वर्षे जगतात. त्यामुळे त्यांची किंमत ही 75 हजार रुपये प्रत्येकी इतकी आहे. त्याचप्रमाणे ब्ल्यू गोल्ड मकाव आणि स्कार्लेट मकाव हे पक्षी साधारण 60 ते 70 वर्षे इतके आयुष्य जगतात आणि प्राणी संग्रहालय व पक्षी गृहांमध्ये पाळीव प्राणी म्हणून देखील ठेवले जातात. त्यांच्याकडे खूप चांगला शब्दसंग्रह असून, ते नक्कल करु शकतात आणि बोलूही शकतात. त्यामुळे ब्ल्यू गोल्ड मकाव या पक्षाची किंमत दोन लाख रुपये प्रत्येकी आणि स्कार्लेट मकाव या पक्षाची किंमत ही चार लाख रुपये प्रत्येकी अशी असून, ते मौल्यवान पक्षी आहेत. सव्वा अकरा लाख रुपयांच्या पक्षांची चोरी झाल्याची नोंद कर्जत पोलीस ठाणे येथे 17 जुलै रोजी करण्यात आली होती.
कर्जत पोलीस ठाणे यांच्या गुन्हे प्रकटीकरण पथकाने सदरचा गुन्हा दाखल होताच घटनास्थळावर तक्रारदार यांच्या मालकीचे असणारे सीसीटीव्ही कॅमेरे बंद होते. त्यामुळे तपास पथकाने घटनास्थळाकडे जाणाऱ्या – येणाऱ्या सर्व मार्गावरील असंख्य सीसीटीव्ही तपासून, त्यातून झिरोइंग करुन गुन्ह्यातील अनोळखी आरोपीत यांची छायाचित्रे मिळवली. त्यानंतर त्यांची गोपनिय बातमीदार यांच्याकडून ओळख पटवून घेऊन तामिळनाडू राज्यात जाऊन या पथकाने त्यांना ताब्यात घेतले. जिल्हा पोलीस अधिक्षक आंचल दलाल आणि अतिरिक्त पोलीस अधिक्षक अभिजित शिवतरे, पोलीस उप अधिक्षक राहुल पाटील यांचे मार्गदर्शन घेऊन कर्जत पोलीस ठाण्याचे प्रतिभारी अधिकारी पोलीस निरीक्षक संदीप भोसले यांच्या गुन्हे प्रकटीकरण पथकाने ही कार्यवाही यशस्वीपणे पूर्ण केली.
या पथकात सहाय्यक पोलीस निरीक्षक राहुल वरोटे, किरण नवले, सुशांत वरक या अधिकाऱ्यांसह पोलीस कर्मचारी समीर भोईर, विठ्ठल घावस, स्वप्नील येरुणकर, प्रवीण भलेरो, सौरभ पाटील यांच्या पथकाने ही कारवाई केली. या गुन्ह्यात कर्जत पोलिसांनी खालापूर तालुक्यातील अनिल रामचंद्र जाधव याला ताब्यात घेऊन नंतर त्याच्या आधारे तामिळनाडू राज्यातून राजेशसिंग माहि उर्फ समशेरसिंग याला पकडून आणले.