बाजारपेठ रस्ते घेणार मोकळा श्वास
| माणगाव | वार्ताहर |
आगामी येणाऱ्या गणेशोत्सव सना निमित्ताने मोठया प्रमाणात गणेशभक्त मुंबईहुन कोकण व तळ कोकणात येत असतात. त्या अनुषंगाने गणेशभक्तांचा प्रवास अधिक सुरक्षित आणि सुखकर व्हावा व माणगाव बाजारपेठेत दरवर्षी होणारी वाहतूक कोंडी यंदाचे वर्षी सोडवण्यासाठी रायगड जिल्हा पोलीस अधिक्षक सोमनाथ घार्गे यांच्या मार्गदर्शनाखाली माणगाव उपविभागीय पोलीस अधिकारी नितीनकुमार पोंदकुले, पोलीस निरीक्षक राजेंद्र पाटील व त्यांचे पोलीस कर्मचारी तसेच नगरपंचायतीचे मुख्याधिकारी संतोष माळी, नगराध्यक्ष ज्ञानदेव पवार, वाहतुक पोलीस या सर्वांनी मिळून उपाययोजना आखण्यासाठी माणगाव बाजारपेठेतील रस्त्याची पाहणी केली जाणार आहे. यावेळी रस्त्यालगत असणारे बेकायदेशीर हॉकर्स, अतिक्रमणे हटवली जाणार आहेत. तसेच रस्त्यावर रेल्वे स्थेशन ते तीनबत्ती नाका दरम्यान दुभाजक बसविण्यात येणार आहेत. त्यामुळे बाजारपेठेतील रस्ते मोकळा श्वास घेणार आहेत. त्यासाठी माणगाव पोलीस सज्ज झाले आहेत.
मुंबई-गोवा महामार्गावर माणगाव या शहरात महामार्गाच्या दोन्ही बाजूने बाजारपेठ असल्याने स्थानिक जनता खरेदीसाठी सतत गर्दी करत असते, तसेच बस स्थानक असल्याने मोठया प्रमाणात वाहतूकीवर परिणाम होत असतो. या अनुषंगाने उपाययोजना आखण्यात आली असून या मार्गावर वाहने पार्किंग न करता अन्य ठिकाणी पर्यायी व्यवस्था पार्किंगची करण्याची सोय आखली आहे. महामार्गालगत असणाऱ्य गटाराच्या पाठीमागे हातगाडे हटविले जाणार आहेत. तसेच रस्त्यालगत खोदलेले नाले, गटारे, ठेकेदारामार्फत भरण्याच्या सुचना दिल्या आहेत.
मुंबई बाजू कडून येणाऱ्या परिवहन बससाठी एम.आर.एफ. टायर शोरूमसमोर बस स्टॉप असणार आहे. जेणे करून बाजारपेठेत वाहतुक कोंडी होणार नाही. तसेच बाजारपेठेतील रिक्षा स्टॉपवर एकच रिक्षा उभी असणार असून बाकी उर्वरित रिक्षा बाजूला असणार आहेत. नंबर आल्यानंतर एक-एक रिक्षा प्रवाशांसाठी उभी असणार आहे. मुख्य बाजारपेठेत महत्वाच्या चार ठिकाणी स्पीकरवरून सूचना दिल्या जाणार आहेत. माणगाव बाजारपेठे मध्ये बॅरिकेट्स लावून वाहतूक सुरळीत राहण्यास मदत होणार आहे. महामार्गावर तसेच पर्यायी मार्गावर जागोजागी दिशा दर्शक फलक लावण्यात येणार आहेत. बाजारपेठेत 10 ते 15 वाहतुक पोलीस व प्रत्येक पॉइंटला 20 ते 25 पोलिसांचा बंदोबस्त ठेवण्यात येणार आहे. गणेशोत्सवात बाजारपेठेत खरेदी करण्यास येणाऱ्या तसेच मुंबई गोवा महामार्गाने येणाऱ्या जाणाऱ्या वाहनांसाठी पार्किंगची व्यवस्था करण्यात येणार आहे. दरम्यानच्या काळात बाजारपेठेत अनधिकृत पार्किंग केल्यास वाहन चालकावर पोलिसांकडून कारवाई केली जाणार आहे. कचेरी रोड, मोर्बा रोड, निजामपूर रोड, व महामार्गावरील मुख्य बाजारपेठेत फुटपाथवरून जाणाऱ्या येणाऱ्या पादचाऱ्यांना त्रास होणार नाही याची काळजी फेरीवाले, हातगाडे व्यावसायिकांनी घ्यावी अशा सूचना दिल्या जाणार आहेत.