बीकेसी मेट्रो स्टेशनला भीषण आग; मेट्रो सेवा ठप्प

। मुंबई । प्रतिनिधी ।

मुंबईतील बीकेसी मेट्रो स्टेशनमध्ये भीषण आग लागल्याची घटना समोर आली आहे. भूमिगत असलेल्या या मेट्रो स्थानकात आगीमुळे धुराचे लोळ उठल्याने प्रवाशांमध्ये एकच खळबळ उडाली. अग्निशमन दल घटनास्थळी तात्काळ पोहोचले असून कोणतीही जीवितहानी झाली नाही. दरम्यान, मेट्रो सेवा बंद करण्यात आली आहे.

वांद्रे कुर्ला कॉम्प्लेक्स (BKC) मेट्रो स्टेशनचे काम सुरु असलेल्या परिसरात आज दुपारी 1 वाजून 9 मिनिटांच्या सुमारास भीषण आग लागली. सुमारे 40 ते 50 फूट खोल तळघरातील लाकडी साठा आणि फर्निचर असलेल्या ठिकाणी ही आग पसरली होती. लाकडाच्या साठ्याला आग लागल्यानंतर धुराचे प्रचंड लोट मेट्रो स्थानकाच्या परिसरात पसरले. घटनास्थळी स्थानिक पोलिसांची टीम आणि अग्निशमन दलाच्या 10 ते 12 गाड्या दाखल झाल्या. सध्या ही आग विझवण्याचे शर्थीचे प्रयत्न सुरु असून कुलिंग ऑपरेशन सुरु आहे. सर्व प्रवाशांना तातडीने बाहेर काढण्यात आले असून सर्व प्रवासी सुखरूप आहेत. कोणतीही जीवितहानी झालेली नाही. मात्र, या घटनेने वाहतूक कोंडी झाली आहे. दरम्यान मुंबई मेट्रो-3 च्या फेऱ्या बंद करण्यात आल्या आहेत.