सुरक्षित मतदार संघाच्या शोधात पेणच्या नगराध्यक्षा

पेण | वार्ताहर |
पेण नगरपालिकेची निवडणूक केव्हाही जाहीर होइल. त्यासाठी आवश्यक पण सुरक्षित मतदार संघ शोधण्याची घाई विद्यमान नगराध्यक्षा प्रीतम पाटील यांना लागली आहे.
गेली दहा वर्ष पेण पालिकेत सत्ता उपभोगणार्‍या नगराध्यक्षांना स्वतःसाठी सुरक्षित प्रभागाची बांधणी करता आली नाही 2016 च्या निवडणुकी मध्ये नगराध्यक्ष हे थेट जनतेतून निवडूण येणार होते. त्यामुळे विद्यमान नगराध्यक्षा प्रितम पाटील यांनी थेट नगराध्यक्षांची निवडणूक लढवून 2100 ते 2200 च्या फरकाने विजय संपादन केला. मात्र 2016 मध्ये पेण शहरात असणारी दुबार मत, जातीचा कार्ड या दोहोंमुळे नगराध्यक्षांचा वेढा पार झाला.
गेल्या पाच वर्षात पुलाखालून मोठया प्रमाणात पाणी वाहून गेलेलं आहे. त्यामुळे नगराध्यक्षा स्वतःसाठी नव्याने प्रभाग शोधण्यात गर्क आहेत. नविन नियमानुसार पुन्हा नगराध्यक्ष नगरसेवकातून निवडला जाणार आहे. त्यामुळे स्वतः कोठून उभे रहायचे यासाठी चाचपणी सुरू झाली आहे. 2011 च्या निवडणुकीमध्ये प्र्रभाग क्रमांक 1 मधून सुलोचना तांडेल यांचा मृत्यु झाल्याने रिक्त झालेल्या जागेवर प्रितम पाटील या पोट निवडणूक लढल्या होत्या. परंतु नवख्या असलेल्या मानसी पाटील यांनी प्रीतम पाटील यांना घाम फोडला होता. त्यावेळेला मा.नगराध्यक्ष संतोष श्रृगांरपुरे, राजू वारकर, सुभाष जैन, रशाद मुजावर यांच्या मध्यस्थितीने व पाठिंब्यामुळेच प्रीतम पाटील निवडून आल्या होत्या. आता पुन्हा प्रभाग रचना असून नगरसेवकातून नगराध्यक्ष निवडला जाणार असल्याने प्रीतम पाटलांना सुरक्षित असा एकही प्रभाग वाटत नसल्याने त्यांची मोठी पंचायत होऊन बसली आहे.
पहिल्यांदा त्यांनी प्रभाग क्रमांक 1 म्हणजे म्हाडा कॉलनी, कुंभार आळी, नंदीमाळ नाका, परिट आळी येथे चाचपणी करण्याचा प्रयत्न केल्याचे समजते. त्यानंतर बाजारपेठेमध्ये. ते जमत नाही तेव्हा प्रभाग क्रमांक 7 मध्ये म्हणजेच शिक्षक सोसायटी, कोळीवाडा, नरदास चाळ, जीजाई नगर येथून लढण्याचे मनसुभे प्रकट केले. मात्र हा प्रभाग नगरसेवक अनिरूध्द पाटील यांचा हक्काचा असल्याने या प्रभागात प्रीतम पाटलांना उमेदवारी मिळणे कठीणच. म्हणून आता चिंचपाडा, देवनगरी, गोदावरी नगर, प्रेम नगर या भागातून नगराध्यक्षा उमेदवारी करणार असल्याचे चर्चेला उधाण आलेला आहे.
या प्रभागाचा विचार करता हा प्रभाग म्हणजे कडू कुटुंबीयांचा बालेकिल्लाच. त्यामुळे बाहेरील उमेदवार या प्रभागात दिल्यास जनता स्विकारणार नाहीच, तसेच नगराध्यक्षांना या प्रभागातून निवडणूक लढवायची असेल तर वैशाली कडू अथवा राजेश म्हात्रे यांना आपला बळी दयावा लागेल. त्यामुळे या प्रभागात देखील प्रितम पाटलांना स्विकारणं खुपच कठीण वाटत आहे. त्यामुळे प्रभाग क्रमांक 4 अथवा 3 मध्ये सुध्दा चाचपणी सुरू आहे. त्यामुळे आगामी येणार्‍या निवडणूकीत पेणच्या नगराध्यक्षा प्रितम पाटील कोणत्या प्रभागातून निवडणूक लढतात हे पाहण्यासाठी पेणच्या जनतेची उत्सुक्ता शिगेला पोहचली आहे.

2021 च्या लोकसंख्येनुसार निवडणूक
जमेची बाजू म्हणजे 2011 च्या जन गणनेच्या नुसार मतदारांचा विचार केला जाणार आहे. त्यातच नविन नियमा नुसार नगरसेवकांच्या संख्येच्या 15 टक्के नगरसेवकांची संख्या वाढणार असल्याने साधारणतः 12 प्रभाग असू शकतील. यामध्ये 3100 ते 3150 मतदार असतील, कारण पेण शहराच्या मतदारांचा विचार करता 37.855 मतदार आहेत. 2016 च्या निवडणूकीमध्ये 10 प्रभाग होते, त्यामध्ये एकूण 21 नगरसेवक. मात्र या निवडणूकीमध्ये 3 नगरसेवकांची वाढ होण्याची शक्यता नाकारता येत नाही. याचाच फायदा नगराध्यक्षा घेतील असे बोलले जात आहे.