निवृत्ती वेतनधारकांना वैद्यकीय भत्ता द्यावा: जिल्हाध्यक्ष धुरंधर मढवी

| मुरुड- जंजिरा | प्रतिनिधी |

राज्य शासनाने संवेदनशील होऊन निवृत्तांचे प्रलंबित प्रश्न सोडवावेत तसेच केंद्रीय निवृत्त कर्मचाऱ्यांप्रमाणे दरमहा 1000 रुपये वैद्यकीय भत्ता द्यावा तसेच ज्येष्ठांना सेवा निवृत्तांप्रमाणे वयोपरत्वे केंद्रीय वाढीचे दराने लाभ मंजूर करावेत, अशी मागणी रायगड जिल्हा सेवानिवृत्त संघटनेचे अध्यक्ष धुरंधर मढवी यांनी केली.

मुरुड येथील हिंदू एज्युकेशन सोसायटीच्या सभागृहात तालुका सेवानिवृत्त संघटनेच्या वार्षिक सर्वसाधारण सभेत मार्गदर्शन करताना धुरंधर मढवी बोलत होते.
यावेळी मुरुड तालुका संघटनेचे अध्यक्ष नयन कर्णिक, उपाध्यक्ष शकील कडू, कोषाध्यक्ष गजानन पाठक, सचिव अनघा चौलकर, माजी सचिव उल्हास भगत, डॉ. मकबुल कोकाटे, हिंदू एज्युकेशन सोसायटी अध्यक्ष दिलीप जोशी, स्टेट बँकेचे शाखाधिकारी सचीन गणवीर, कार्यकारिणी सदस्य केशव साने, उषा खोत, बाळकृष्ण कासार, रवींद्र जंजिरकर, विलास जगताप, नैनिता कर्णिक, रमेश कवळे, प्रा. मेघराज जाधव, केशव मोहिते आदी मान्यवर उपस्थित होते. आपल्या मार्गदर्शनात धुरंधर मढवी पुढे म्हणाले की, राज्य सरकारने सेवा निवृत्त कर्मचाऱ्यांच्या समस्या सोडविण्यासाठी मंत्रालयात स्वतंत्र कक्ष सुरू करावे. तसेच निवृत्तधारकांवर अवलंबून कुटुंबातील अविवाहित मुली, घटस्फोटित मुली तसेच दिव्यांग मुलींना कुटुंब निवृत्ती वेतनाच्या आदेशानुसार निवृत्ती वेतन सुरु करावे, अशी मागणी केली.

प्रास्ताविकात नयन कर्णिक यांनी संघटना निवृत्तांचे प्रश्न सोडविण्यासाठी कटिबद्ध असल्याचे सांगून सर्वांना संघटित राहण्याचे आवाहन केले, तर माजी सचिव उल्हास भगत यांनी इतिवृत्ताचे वाचन केले, तसेच कोषाध्यक्ष गजानन पाठक यांनी अहवाल अंदाजपत्रकाचे वाचन करून ऑडिट रिपोर्ट सादर केला. यावेळी डॉ. मकबुल कोकाटे यांनी निवृतांनी स्वतःसाठी जगावे. पेन्शनची काही रक्कम आरोग्यासाठी बचत म्हणून बाजूला ठेवावी. तसेच ज्येष्ठांनी मानसिक स्थिती योग्य ठेवावी.आणि मुला-मुलींची फार काळजी न करता पेन्शनचा विनियोग स्वतःसाठी करण्याचा सल्ला देत दिवसेंदिवस वृद्धाश्रमांची वाढती संख्या चिंताजनक असल्याचे सांगितले.

स्टेट बँकेचे शाखाधिकारी सचिन गणवीर यांनी पेन्शनर्सना चांगली ग्राहक सेवा दिली जाईल, याची ग्वाही दिली. यावेळी जिल्हा अध्यक्ष धुरंधर मढवी व संजीवनी आरोग्य केद्रांचे कार्याध्यक्ष विजय सुर्वे आणि डॉ. मकबुल कोकाटे यांचा शाल, श्रीफळ देऊन सन्मान करण्यात आला. या सभेस निवृत्त महिला पुरुषांनी आवर्जून उपस्थिती दर्शवली होती. कार्यक्रमाचे सूत्रसंचालन उषा खोत यांनी, तर आभार प्रदर्शन उपाध्यक्ष शकील कडू यांनी केले.