प्रश्नांचा भडीमार करीत शिक्षण अधिकाऱ्यांना धरले धारेवर
| रायगड | जिल्हा प्रतिनिधी |
महाड-पोलादपूरमधील शिक्षण विभागातील अनियमितता, मनमानी कारभार, विद्यार्थ्यांच्या हिताच्या प्रलंबित तक्रारी अशा अनेक प्रश्नांबाबत जिल्हा परिषद प्राथमिक शिक्षण विभागाकडे निवेदन देण्यात आले. मात्र अधिकाऱ्यांकडून त्याची दखल घेण्यात आली नाही. त्यामुळे संतप्त झालेल्या मनविसेच्या पदाधिकाऱ्यांनी बुधवारी (दि.17) मुख्य कार्यकारी अधिकारी नेहा भोसले यांच्यासह शिक्षणाधिकारी ललिता दहितुले यांची भेट घेतली. यावेळी महाड-पोलादपूरमधील शैक्षणिक प्रश्न मोठ्या प्रमाणात तापला. प्रश्नांचा भडीमार करीत अधिकाऱ्यांना धारेवर धरले. अखेर प्रशासनाने योग्य ती कार्यवाही तात्काळ केली जाईल, असे आश्वासन दिले. त्यानंतर हे प्रकरण शांत झाले.
यावेळी महाराष्ट्र नवनिर्माण विद्यार्थी सेनेचे दक्षिण रायगड जिल्हा अध्यक्ष प्रतिक राहटे, मनसेचे माजी दक्षिण रायगड जिल्हा सचिव अमोल पेणकर, विद्यार्थी सेनेचे उपाध्यक्ष विवेक ठोंबरे, महाड तालुका अध्यक्ष अथर्व देशमुख, उपाध्यक्ष रोहित सावंत, पोलादपूर तालुका संपर्क अध्यक्ष सुरज कदम, बिरवाडी शहर अध्यक्ष साहिल राणे, अलिबाग तालुका मनसे अध्यक्ष सिध्देश म्हात्रे, सचिव विनायक पालेकर, आदी पदाधिकारी, शिष्टमंडळ उपस्थित होते.
महाराष्ट्र नवनिर्माण विद्यार्थी सेनेच्या पदाधिकारी यांच्याकडून मिळालेल्या माहितीनुसार, महाड व पोलादपूर तालुक्यातील शिक्षण विभागातील विविध प्रशासकिय अनियमितता, शैक्षणिक व प्रशासकीय त्रुटी, आर्थिक व्यवहारातील संशयास्पद बाबी, मनमानी कारभार, विद्यार्थी हिताच्या अनेक प्रश्नांबाबत जिल्हा परिषद प्राथमिक शिक्षण विभागाकडे पत्र देण्यात आले आहे. वेळोवेळी पाठपुरावा केला निवेदने दिले. परंतू प्रतिसाद मिळाला नाही. कोकण आयुक्त, उपशिक्षण संचालक यांनी आदेश देऊनही शिक्षण विभागाने कोणतीही कार्यवाही केली नाही. त्यामुळे विद्यार्थ्यांच्या हितासह अन्य प्रश्नांबाबत शिक्षण विभाग जाणीवपुर्वक दुर्लक्ष करीत आहे की काय? असा प्रश्न निर्माण झाला होता. त्यामुळे महाराष्ट्र नवनिर्माण विद्यार्थी सेनेच्या पदाधिकाऱ्यांनी शिक्षणाधिकारी यांच्यासह मुख्य कार्यकारी अधिकारी यांची भेट घेतली. पोलादपूर, महाडमधील शिक्षण विभागाच्या प्रश्नांबाबत जे निवेदन दिले त्यांची काय कार्यवाही, अशा अनेक प्रश्नांचा भडीमार पदाधिकाऱ्यांनी केले. शिक्षणाधिकारी दहीतुले यांना धारेवर धरण्यात आले. अखेर मुख्य कार्यकारी अधिकारी यांनी या प्रश्नांबाबत दखल घेऊन कार्यवाही केली जाईल, असे आश्वासन दिले. त्यानंतर ही बैठक संपली.
महाड पोलादपूरमधील शाळेतील शिक्षकांची अनुपस्थिती, पोषण आहार अशा अनेक प्रश्नांबाबत मुख्य कार्यकारी अधिकारी यांची भेट घेतली. आरोप असलेल्या अधिकाऱ्यांचे निलंबन तातडीने केली जाईल असे मुख्य कार्यकारी अधिकारी यांनी या बैठकीत आश्वासन दिले असून योग्य ती कार्यवाही केली जाईल असे त्यांनी सांगितले आहे.
– ओमकार मोहिरे – अध्यक्ष
पोलादपूर तालुका महाराष्ट्र नवनिर्माण विद्यार्थी सेना